حکومت دا آئی ٹی تعلیم دے معیار اچ بہتری، ایکریڈیٹیشن دے نظام کوں مؤثر بݨاوݨ ،صنعتی ضرورتاں نال ہم آہنگ افرادی قوت کیتے اقدامات تکھے کرݨ دا فیصلہ

اسلام آباد۔19 ستمبر(اے پی پی) وفاقی وزیر اقتصادی امور و اسٹیبلشمنٹ سینیٹر احد چیمہ غير منظور شدہ آئی ٹی تعلیمی اداریں تے تعلیمی پروگراماں وچ غیر تسلیم شدہ داخلیں کوں روکݨ کیتے ہک جامع نظام بݨاوݨ دی ہدایت کیتی اے تاں جو طلبہ کوں بین الاقوامی معیار دی مہارتاں نال آراستہ کیتا ونڄ سڳے۔ اعلیٰ سطحی اجلاس دی صدارت کریندے وفاقی وزیر وزارتِ انفارمیشن ٹیکنالوجی کوں ہدایت کیتی جو غير منظور شدہ اداریں توں فارغ التحصیل طلبہ دی تعداد دا پتہ لاتا ونڄے تے آگاہی کیتے مؤثر نظام بݨایا ونڄے تاں جو داخلہ گھنݨ آلے طلبہ کوں جامعات تے پروگراماں دی منظوری دے بارے پہلے توں مستند معلومات حاصل ہوون۔ ایں توں علاوہ اجلاس وچ آئی ٹی اسکلز اسیسمنٹ ٹیسٹ دا جائزہ ڳھدا ڳیا جیندے وچ 188 تعلیمی اداریں دے 33 ہزار توں ودھ طلبہ شرکت کیتی ہئی، وفاقی وزیر ایں ٹیسٹ دے نظام کوں انڈسٹری دی نویں ضرورتاں نال ہم آہنگ کرݨ تے تعلیمی اداریں دی کارکردگی تے رپورٹ تیار کرݨ دی ہدایت کیتی۔سینیٹر احد چیمہ تعلیمی قابلیت تے عملی مہارتاں دے فرق کوں ختم کرݨ تے زور ڈتا، خصوصاً ایجھے معاملیں وچ جتھاں طلبہ ڈگری مکمل کرݨ دے باوجود اسکلز ٹیسٹ وچ ناکام تھی ویندن یا ڈگری توں پہلے ہی کامیاب تھی ویندن۔ انہاں پاکستان سافٹ ویئر ہاؤسز ایسوسی ایشن تے صنعت دے ٻئے شراکت داراں نال مشاورت دی ہدایت کیتی تاں جو تعلیمی پروگراماں کوں آئی ٹی شعبے دی حقیقی لوڑھاں موجب بݨایا ونڄ سڳے۔ اجلاس وچ ہائر ایجوکیشن کمیشن، این سی ای اے سی تے صوبائی اعلیٰ تعلیمی اداریں وچال مشترکہ حکمتِ عملی تے سانجھے تعاون کوں ودھاوݨ تے اتفاق کیتا ڳیا۔ وفاقی وزیر واضح کیتا جو ایں ساری کوششاں دا بنیادی مقصد آئی ٹی تعلیم دے معیار کوں چنڳاں بݨاوݨ، طلبہ دے مفادات دا تحفظ کرݨ تے پاکستانی گریجویٹس کیتے روزگار دے موقع پیدا کرݨ اے۔