وزیراعظم عمران خان داکراچی دے مسئلیں دے مستقل حل کیتے 1100 ارب روپے دے تاریخی پیکج دا اعلان

سیوریج سسٹم ، سالڈ ویسٹ دا مسئلہ وی ایں پیکج دے تحت حل کیتا ویسی ، سرکلر ریلوے تے گرین لائن منصوبہ وی پورا کرنڑ دا اعلان
کراچی ۔ 5 ستمبر (اے پی پی) وزیراعظم عمران خان کراچی دے مسئلیں دے مستقل حل کیتے 1100 ارب روپے دے تاریخی پیکج دا اعلان کرڈتے ، اے پیکیج وفاقی تے صوبائی حکومت رل تے بنڑائے ، کراچی دے مسئلے دے حل کیتے صوبائی کوآرڈینیشن عمل درآمد کمیٹی تشکیل ڈتی گئی اے ۔ ہفتے کوں کراچی دے دورے دے موقع تے کراچی کمیٹی دے اجلاس دے بعد گورنر سندھ عمران اسماعیل اتے وزیراعلی سید مراد علی شاہ دے رلے میڈیا نال گال مہاڑ کریندے ہوئیں وزیراعظم عمران خان ایں تاریخی پیکیج دا اعلان کیتا۔ انہاں آکھیے جو کراچی دے مسئلے دے حل کیتے اجلاس اچ تفصیلی گال مہاڑ کیتی گئی ، اساں کوشش کریسوں جو ترائے سال اچ پانڑیں دا مسئلہ مستقل حل تھی ونجے ، نالیں دی صفائی دا کم این ڈی ایم اے دے حوالے کیتا گئے جیں تے اوں کم شروع کرڈتے ۔اتھاں آباد غریب لوک بے گھر تھیسن جنہاں کوں ولا وساونڑ دی ذمے واری سندھ حکومت دی اے ۔ وزیراعظم آکھیا جو سیوریج سسٹم دے حوالے نال وی فیصلہ کیتا گئے ،ایں پیکج اچ ایں مسئلے کوں وی پورا حل کیتا ویسی ، ایندے نال سالڈ ویسٹ دا مسئلہ وی ایں پیکیج نال حل کیتا ویسی ۔ وزیراعظم آکھیا جو کراچی اچ ٹرانسپورٹ دا مسئلہ حل کرنڑ کیتے سرکلر ریلوے وی ایں پیکیج دے تحت پورا تھیسی ، کراچی اچ گرین لائن منصوبہ وی پورا کریسوں۔ وزیراعظم آکھیا جو کراچے دے لوکاں کوں اوکھے حالات توں گزرنڑاں پئے تاں جو اے مسئلہ ایں کمیٹی دے تعاون نال حل کریسوں ۔وزیراعظم آکھیا جو کراچی اچ مسئلیں اچوں ہک مسئلہ اے وی ہئی جو مختلف علاقیں اچ مختلف اداریں یا محکمیں دیاں حدود ہن جیں پاروں ایندے تے عمل درآمد اوکھا ہئی ،ہنڑ پی سی آئی سی اچ سارے فریق ہک جاہ تے آگئن انہاں اچ وفاقی ، صوبائی حکومتاں اتے پاک فوج وی شامل اے ۔ وزیراعظم آکھیا جو ایں اصل کم تے منصوبیں تے عمل درآمدا اے ، امید اے کراچی دے لوکاں جیرھا اوکھا ویلھا گزاریے ہنڑ انہاں کوں نجات مل ویسی ۔