پاکستان ہک امن پسند ملک اے، لیکن اگر اساں تے جنگ مسلط کیتی گی تاں اساں سلھ دا جواب پتھر نال ڈیسوں جیں دا مظاہرہ اساں بالاکوٹ دے ناکام حملے دے جواب اچ ڈتے، پاک فوج دے سربراہ جنرل قمر جاوید باجوہ دا یوم شہداء دے موقع تے جی ایچ کیو اچ ایورڈ ونڈنڑ دی تقریب توں خطاب

راولپنڈی۔ 6 ستمبر(اے پی پی) پاک فوج دے سربراہ جنرل قمر جاوید باجوہ آکھیے جو پاکستان ہک امن پسند ملک اے لیکن اگر اساں تے جنگ مسلط کیتی گی تاں اساں سلھ دا جواب پتھر نال ڈیسوں جیں دا مظاہرہ اساں بالاکوٹ دے ناکام حملے دے جواب اچ ڈتے،اساکوں نہ تاں نویں حاصل کیتے اسلحے دے انبار توں مرعوب کیتا ونج سگدے تے نہ ہی اساں تے کوئی تڑی اثرکرسگدی اے ، افواج پاکستان پوری طاقت نال لیس، تکڑی تے خبر رکھنڑ آلی اے اتے انشاءاللہ دشمن دی کہیں وی حرکت دا وختی تے پوری طاقت نال جواب ڈیونڑ کیتے تیار اوں ، پوری دنیا تے خاص طور تے آپنڑے خطے اچ امن چاہندوں ، افغانستان اچ امن قائم کرنڑ دیاں کوششاں اچ پاکستان دا کلیدی کردار ایندا منہ بولیندا ثبوت اے ،تاں جو اساڈے ہمسایہ ملک ہندوستان ہمیشہ وانگوں ہک غیرذمہ دارانہ رویہ اختیار کر رکھیے تے خاص طور تے مقبوضہ کشمیر دی خصوصی حیثیت کوں مکاونڑ دے غیرقانونی اقدام دے بعد خطے دے امن کوں ہک واری ول ودھ سارے خطرے توں ڈوچار کرڈتے ۔او اتوار کوں یوم شہداء دے موقع تے جی ایچ کیو اچ ایورڈ تقیسم کرنڑ دی تقریب توں خطاب کریندے پئے ہن ۔ پاک فوج دے شعبہ تعلقات عامہ (آئی ایس پی آر) موجب پاک فوج دے سربراہ جنرل قمر جاوید باجوہ آکھیے جو 6 ستمبر 1965ءدا ڈینھ اساڈی تاریخ دا ہک لازوال باب اے۔ اے ڈینھ جڈاں قوم دی یکجہتی ، وطن نال محنت تے قربانی تے بہادری دیاں ودھ ساریاں داستاناں رقم تھیاں ۔ پاکستانی قوم کیتے چھی ستمبر صرف ہک ڈینھ کائنی بلکہ اساڈے حوصلے دی سنجانڑ وی اے ۔اے ڈینھ 1948، 1965، 1971، کارگل دی جنگ اتے دہشت گردی دے خلاف جنگ اچ شہید تھیونڑ آلیں دی یاد اچ منایا ویندے ۔اے ڈینھ اساکوں یاد ڈویندے جو جو اساں کل وی آپنڑے توں کئی گنا وڈے دشمن کوں شکست ڈٹی تے اج وی دشمن دے ناپاک عزائم کوں شکست ڈیونڑ کیتے ہر ویلھے تیار اوں ۔اج وی اساں آپنڑی آزادی دی حفاظت آپنڑی رت نال کریندے پیوں ۔اج اساکوں آپنڑے شہدا تے غازیاں دے عظیم کارنامیں کوں یاد کرنڑ انہاں دیاں قربانیاں کوں خراجِ تحسین پیش کرنڑ کیتے اتھاں موجود ہوں ۔انہاں دی جرات ، بہادری اتے قربانیوں دی بدولت اساڈی آزادی، خود مختاری، امن و سلامتی قائم اے۔ میڈے سامنڑے شہدا ءدے اہلِ خانہ موجود ہن۔ میں انہاں کوں سلام پیش کرینداں اتے انہاں کوں یقین ڈوینداں جو انہاں دے پیاریں دی قربانی کوں کڈاہیں نہ بھلسوں ،اساڈے شہید اساڈے ہیرو ہن جیرھیاں قوماں آپنڑے ہیروز کوں بھل ویندن او قوماں مٹ ویندن ۔