سانحہ موٹر وے پوری قوم کوں جھنجوڑیے،اینجھے قوانین گھن آسوں جومجرم جرم دا سوچے وی نہ،ساڈا مقابلہ مافیاز نال اے،نواز شریف کوں ولا گھن آونڑ کیتے پورا زور لیسوں،کشمیر دے مسلے تے پاکستان انٹرنیشنل کریمنل کورٹ نال وی رجوع کر سگدے،وزیراعظم عمران خان دا نجی ٹی وی چینل کوں تفصیلی انٹرویو

اسلام آباد ۔ 14 ستمبر (اے پی پی) وزیراعظم عمران خان آکھیے جو حکومت دے پہلے ڈو سال بہوں اوکھے گذرین، مالی بحران،چڑھدے بیرونی قرضے، بڈدی معیشت ،کرونا دی صورتحال اتے اپوزیشن دی بلیک میلنگ وڈے چیلجز ہن بھل حکومت مناسب حکمت عملی نال درست ٹریک تے آگئی اے،سانحہ موٹر وے پوری قوم کوں جھنجوڑیے ،اینجھے قوانین گھن آسوں جومجرم جرم دا سوچے وی نہ،ساڈا مقابلہ مافیاز نال اے،نواز شریف کوں ولا گھن آونڑ کیتے پورا زور لیسوں،تبدیلی تھیندی پئی اے تھیندی وی راہسی۔اے گالھیں انہاں نجی چینل کوں ڈتے گئے ہک تفصیلی انٹرویو اچ آکھی اے۔وزیراعظم عمران خان آکھیے جوموٹر وے سانحہ پوری قوم کوں ہلا ڈتے،اینجھے ملزماں کوں سر عام پھاسی ڈے ڈیونڑی چاہیدی اے،زیادتی کرنڑ آلے مجرماں دی کیسٹریشن کیتی ونجے،اے انیجھی سزا ہوسی جو او کجھ کرنڑ جوگے نہ راہون جیندے کیتے قانون سازی کیتی ویسی جو مجرم جرم کرنڑ دا سوچے وی نہ۔ وزیراعظم عمران خان اپوزیشن کوں بلیک میلراں دا ٹولہ اتے مافیا قرار ڈیندے آکھیے جو اپوزیشن ہر معاملے تے بلیک میل کرنڑدی کوشش اچ لگی ہوئی اے،اپوزیشن دا ہکو مقصد اے ”این آر او“ تہوں اے پہلے ڈینھ توں حکومت کوں ناکام قرار ڈیندے آہدن،روز حکومت ڈھواونڑ دی دھمکیاں ڈیندن،پہلے پیپلز پارٹی اتے ن لیگ ہک بئے دے خلاف ہین، اج اپنڑی کرپشن اتے چوری بچاونڑ کیتے ساری اپوزیشن کٹھی تھی چکی اے،انہاں پہلے وی پرویز مشرف تے دباو سٹ تے این آر گھدے جیندا خمیازہ اج تئیں ملک و قوم بھگتیندی پئی اے بھل اساں کہیں دے ہتھو بلیک میل تھیسوں نہ این آر او ڈیسوں۔ ہک سوال دے ولدے اچ وزیراعظم آکھیے جو اقوام متحدہ دی جنرل اسمبلی نال خطاب دا وڈا ایجنڈامسلہ کشمیر اتے ڈوجھا موسمیاتی تبدیلی اے،بھارت کشمیراچ غیر قانونی اقداما چا تے اپنڑے پیریں تے کہاڑی مار گھدی اے، اوکوں چیتا ہی نئیں ریہا جو اینداری ایکشن کیا تھیسی،جیویں پاکستان جگ اچ مسلہ کشمیر چاتے اوندے بعد بھارت پھس گئے،جیکر معاملات ایویں رہے تاں پاکستان انٹرنیشنل کریمنل کورٹ نال وی رجوع کر سگدے کیوں جو کشمیر دے مسلے تے ڈھل نئیں ڈکھائی ونج سگدی۔انہاں آکھیے جو مردم شماری بارے کراچی دے خدشات درست ہیں۔وزیراعظم آکھیے جوچھی ارب ڈالر اساں نسے ڈے سگدے،ایں سانگے ریکو ڈک معاملے دی سیٹلمنٹ دی پوری کوشش اے۔