پاکستان، عراق نال ݙو پاسہ تعلقات کوں قدر نال ݙیکھدے، وزیر خارجہ شاہ محمود قریشی دی عراقی ہم منصب نال ڳالھ مہاڑ

اسلام آباد۔29مئی (اے پی پی) وزیر خارجہ شاہ محمود قریشی آکھیا جو پاکستان، عراق نال ݙو پاسہ تعلقات کوں قدر نال ݙیکھدے۔ دہشت گردی دے خلاف جنگ اچ ݙوہیں ملک ہک ݙوجھے دے تجربیاں توں فائدہ چا سڳدن۔ دفتر خارجہ دے مطابق ہفتہ کوں عراقی دارالحکومت بغداد اچ وزیر خارجہ شاہ محمود قریشی اتے انہاں دے عراقی ہم منصب فواد حسین وچال ملاقات تھئی۔ ملاقات اچ ݙو پاسہ تعلقات ، کثیر الجہتی شعبیاں اچ ݙو پاسہ تعاون دے ودھارے سودھے آپسی دلچسپی دے اہم علاقائی تے عالمی معاملیاں تے ڳالھ مہاڑ کیتی ڳئی۔ وزیرخارجہ دورہ عراق دی دعوت تے پر خلوص میزبانی تے عراقی وزیرخارجہ دا شکریہ ادا کیتا اتے آکھیا جو پاکستان، عراق نال ݙو پاسہ تعلقات کوں قدر نال ݙیکھدے۔- پاکستان اتے عراق وچال، تجارت، سرمایہ کاری، تعلیم، ٹیکنالوجی، انفراسٹرکچر ڈویلپمنٹ سمیت آپسی دلچسپی دے مختلف شعبیاں اچ ݙو پاسہ تعاون ودھاوݨ دے ٻہوں موقع موجود ہن۔ ۔وزیر خارجہ مخدوم شاہ محمود قریشی عراقی ہم منصب کوں فلسطین اتے مقبوضہ جموں و کشمیر اچ جاری انسانی حقوق دی پامالیاں بارے پاکستان دے نکتہ نظر بارے ݙسیا۔ عراقی وزیر خارجہ فواد حسین کرونا وبا اچ امدادی سامان ݙیوݨ تے وزیرخارجہ اتے پاکستان دی قیادت دا شکریہ ادا کیتا۔