اسلام آباد۔10جون (اے پی پی):وزیر خارجہ مخدوم شاہ محمود قریشی آکھیے جو پاکستان اتے چین وچال ستر سالہ لازوال برادرانہ تعلقات عمدہ سفارتی رابطے دا مظہر ہن۔گزریل ست دہائیاں دے دوران پاکستان تے چین وچال ݙو پاسے تعلقات علاقائی تے بین الاقوامی حالات توں بالاتر مضبوط توں مضبوط تر تھیندے ڳئے ۔پاک چین اقتصادی راہداری انہاں ݙوپاسے تعلقات کوں اچے پاسے گھن ونڄݨ اچ اہم کردار ادا کیتے ۔سی پیک دے پہلے مرحلے دی کامیابی دے بعد، صنعتی، زرعی اتے ترقیاتی شعبہ جات اچ ݙو پاسے تعاون دی بنیاد تے ݙوجھا مرحلہ زیر عمل اے ۔سی پیک، بیلٹ اینڈ روڈ اقدام دا اہم منصوبہ ہووݨ دے ناطے، علاقائی رابطے دے ودھارے کیتے پاکستان دی جیو اکنامک ترجیح اچ معاونت کریسی۔وزیر خارجہ خمیس کوں پاکستان اتے چین اچ سفارتی تعلقات دے قیام دے 70 سال مکمل تھیوݨ تے یادگاری سکے دے اجراءدی تقریب توں خطاب کریندے پئے ہن ۔وزیر خارجہ ایں تقریب دے انعقاد تےاسٹیٹ بینک آف پاکستان کوں مبارخ ݙتی تے آکھیے جو یادگاری سکہ دی خوبصورت ڈیزائننگ اتے بݨاوٹ دے حوالے نال پاکستان دی ٹکسال دی کارکردگی قابلِ تحسین اے۔
