اسلام آباد۔29جون (اے پی پی):چیئرمین سینیٹ محمد صادق سنجرانی پارلیمانی وفد دے رلے پختونخوا ملی عوامی پارٹی دے سابق سینیٹر مرحوم محمد عثمان خان کاکڑ دی مسلم باغ اچ انہاں دے گھر وںڄ تے انہاں دے اہلخانہ نال تعزیت کیتی اے ۔ سینیٹ سیکرٹریٹ توں جاری بیان موجب چیئرمین سینیٹ محمد عثمان کاکڑ دی مغفرت اتے اچے درجے کیتے دعا کیتی ۔انہاں آکھیے جو مرحوم سینیٹر دی اچانک وفات تے ݙکھ تے افسوس تھئے ، صوبہ بلوچستان ھک قد آور سیاستدان توں محروم تھی ڳئے ، مرحوم سینیٹر صوبہ بلوچستان دے عوام دی صحیح معنی اچ ترجمانی کیتی۔ چیئرمین سینیٹ آکھیے جو محمد عثمان خان کاکڑ سینیٹ ہاؤس اتے سینیٹ دیاں کمیٹیاں اچ بلوچستان دے مسئلیں کوں چنڳے طریقے نال چاتا ، ملک دے پسماندہ علاقیں تے خاص طور تے صوبہ بلوچستان کیتے عثمان خان کاکڑ دی خدمات کوں ہمیشہ یاد رکھیا ویسی ۔انہاں آکھیے جو عثمان کاکڑ ھک اصول پرست اتے مدبر سیاستدان ہن، عثمان کاکڑ دی سیاسی و سماجی خدمات کوں ہمیشہ یاد رکھیا ویسی ، مرحوم پسماندہ طبقات دے حقوق دی فراہمی کیتے ہمیشہ جدوجہد کریندے رہیے۔ انہاں آکھیے جو عثمان کاکڑ دے انتقال نال ٻہوں وݙا سیاسی خلا پیدا تھی ڳئے جیں کوں پر کرݨ ٻہوں اوکھا اے ۔ چیئرمین سینیٹ پارلیمانی وفد دے رلے کجھ ویلھا ݙکھی خاندان دے رلے گزاریا۔ پارلیمانی وفد اچ چیئرمین سینیٹ دے رلے سینیٹرز سرفرازاحمد بگٹی، احمد خان، محمد عبدالقادر، منظور کاکڑ، دنیش کمار اتے پرنس عمر احمدزئی شامل ہن۔
