اسلام آباد۔29جون (اے پی پی):پاک فضائیہ دے سربراہ ایئر چیف مارشل ظہیر احمد بابر سدھو ترکی دے 4 ݙینھ دے سرکاری دورے دے دوران منگل کوں ترکی دی سینئر فوجی قیادت نال ملاقات کیتی اے ۔ ائیر چیف ترکی دے وزیر قومی دفاع ہولوسی ایکار اتے ترکی دے چیف آف جنرل اسٹاف جنرل یاسر گلر نال انڄ انڄ ملاقات کیتی ۔ ملاقاتاں دے دوران پاک ترک دفاعی تعلقات کوں مزید ودھارا ݙیوݨ تے ݙوہیں فضائی افواج وچال سانجھی تجربے توں فیدہ چیندے ہوئیں طرفین دی حربی استعداد ودھاوݨ تے ڳال مہاڑ کیتی ڳئی اے۔ پاک فضائیہ دے ترجمان دے مطابق بعد اچ ایئر چیف مارشل ظہیر احمد بابر سدھو کمانڈر ترک ایئر فورس جنرل حسن کوکاکیز نال وی ملاقات کیتی ۔ معزز سربراہان ݙوہیں ملکاں دی فضائی افواج کوں عصرحاضر دے در پیش چیلنجز نال نبڑݨ کیتے ھک ݙوجھے دیاں مہارتاں توں فیدہ چاوݨ تے سانجھے تعاون دے ودھارے تے تفصیلی ڳال مہاڑ کیتی ڳئی اے ۔ ملاقات اچ پی اے ایف اتے ترک فضائیہ دے درمیان ہوابازاں دی تربیت اتے تبادلے تے وی ڳال مہاڑ تھئی ۔ سربراہ پاک فضائیہ ایئرچیف مارشل ظہیر احمد بابر سدھو کوں ݙوہیں فضائی افواج وچال سانجھے تعاون اتے تعلقات دے ودھارے دی شاندار خدمات دے اعتراف اچ ترک آرمڈ فورسز دے لیجن آف میرٹ ایوارڈ نال وی نوازیا ڳیا ۔ کمانڈر ترک فضائیہ جنرل حسن کوکاکیز تمغہ پیش کیتا۔
