اسلام آباد۔29جون(اے پی پی)پاکستان اتے جاپان دفاعی و سیکورٹی تعاون اتے باہمی معاملات کوں ٻیا اڳو تے ودھاوݨ تے اتفاق کیتے۔ ترجمان دفتر خارجہ آکھیے جو پاکستان جاپان سیکورٹی مذاکرات دا اٹھواں مرحلہ منگل کوں آن لائن تھئے جیندے اچ سیاسی و عسکری اتے خالص عسکری سطح تے مذاکرات دا دور شامل ہا۔ سیاسی ملٹری مذاکرات اچ پاکستانی وفد دی اڳواݨی ایڈیشنل سیکرٹری(ایشیاءپیسفک)زاہد حفیظ چوہدری ڄݙاں جو جاپانی وفد دی قیادت ڈائریکٹر جنرل شعبہ جنوب مشرقی اتے جنوب مغربی ایشیائی امور کوبایاشی کیتی۔ ملٹری ٹو ملٹری مذاکرات اچ پاکستانی وفد دی قیادت ایڈیشنل سیکرٹری وزارت دفاع ریئر ایڈ مرل مرزا فواد امین بیگ اتے جاپانی وفد دی اڳواݨی ڈائریکٹر جنرل برائے بین الاقوامی امور، بیرو دفاعی پالیسی وزارت دفاع جاپان کیتی۔ فریقین سیکورٹی پالیسیاں سودھا علاقائی و بین الاقوامی امور تے الایا۔ ایں سانڳے ہمسایہ ملکان نال تعلقات، دہشت گردی دے خلاف جنگ اچ کوششاں تے الایا ڳیا۔ مذاکرات اچ جنوبی ایشیاء اچ پائیدار امن و استحکام کیتے وݙے تنازعات بین الاقوامی قوانین اتے یو این سلامتی کونسل دے متعلقہ قرارداداں دے مطابق پر امن طریقے نال حل کرݨ تے زور ݙتا ڳئے۔
