اسلام آباد۔6جولائی (اے پی پی):وفاقی وزیر تعلیم و پیشہ وارانہ تربیت شفقت محمود آکھیے جو انٹر بورڈ کمیٹی آف چیئرمینز آئی بی سی سی دی سرٹیفکیٹس ایکولینس کیتے بݨائی ونڄݨ آلی ای پورٹل توں طلبا کوں اپݨی تعلیمی اسناد دی ایکولینس اچ سوکھ تھیسی تے ویلھا بچسی ۔منگل کوں انہاں وزارت تعلیم اچ آئی بی سی سی ای پورٹل دا افتتاح کیتا۔ ایں موقع تے پارلیمانی سیکرٹری تعلیم وجیہہ قمر ، سیکرٹری تعلیم اتے سیکرٹری آئی بی سی سی غلام علی ملاح موجود ہن۔ ایں موقع تے وفاقی وزیر تعلیم شفقت محمود اپݨے خطاب اچ آئی بی سی سی کوں ای پورٹل دے اجرا تے مبارخ ݙتی ، انہاں آکھیے جو ایں پورٹل توں طالب علماں کوں آپݨی قیمتی تعلیمی اسناد کوں محفوظ کرݨ کیتے ایکولینس حاصل کرݨ اچ مدد ملسی اتے او ایندی ٹریکنگ وی کرسڳسن۔ انہاں آکھیے جو ای پورٹل تے آن لائن فیس جمع کراوݨ دی وی سہولت میسر اے تے طالب علماں کوں بینکاں اچ لمبیاں لائناں دی زحمت نہ کرݨی پوسی ۔وفاقی وزیر آکھیے جو آئی بی سی سی دا ایکولینس دا پراݨا نظام وی کم کریندا رہسی کیوں جو جنہاں علاقیں اچ آن لائن دی سہولت میسر کائنی او آئی بی سی سی دے دفتر اچ ونڄ تے آپݨیاں سنداں دی ایکولینس حاصل کر سڳدن ۔ شفقت محمود آکھیے جو ملک اچ تقریباً30 دے نیڑے تعلیمی بورڈز کم کریندے پئن ۔ انہاں دے علاوہ کیمبرج اتے بئے بین الاقوامی بورڈز وی ہن ۔ انہاں سارے مشورے توں اے سسٹم تیار کیتا ڳئے ، ایندے وچ طلبا دی قیمتی سنداں ونڄ ونڄݨ دا کوئی خطرہ نہ رہسی تے محفوظ رہسن ۔
