اسلام آباد۔21جولائی (اے پی پی):صدر مملکت ڈاکٹر عارف علوی اتے وزیراعظم عمران خان سینئر صحافی عارف نظامی دے انتقال تے ݙکھ تے افسوس دا اظہار کیتے ۔ صدر مملکت اتے وزیر اعظم مرحوم دی مغفرت اتے اچے درجے کیتے دعا کریندے ہوئیں آکھیے جو اﷲ تعالیٰ مرحوم دے خاندان کوں صبر ݙیوے ،وزیر اعظم بدھ کوں ھک ٹویٹ اچ ممتاز صحافی، مدیراتے سیاسی تجزیہ کار عارف نظامی دے انتقال تے ݙکھ تے افسوس کیتے ، انہاں آکھیے جو عارف نظامی دے انتقال دی خبر تے او ݙکھی تھئن ، میݙی تعزیت اتے دعاواں انہاں دے خاندان نال ہن ۔ صدر آکھیے جو صحافت دے میدان اچ عارف نظامی مرحوم دی خدمات کوں ہمیشہ یاد رکھیا ویسی ۔ مرحوم دے لواحقین دے مطابق سینئر صحافی دا لاہور اچ عارضہ قلب پاروں انتقال تھئے ، او نوائے وقت گروپ دے بانی مرحوم حمید نظامی دے پتر ہن ۔
