اسلام آباد۔15ستمبر (اے پی پی):وزیرِ اعظم عمران خان متعلقہ محکمیں کوں ہدایت کیتی اے جو سیاحتی جاہواں تے ٹورسٹ ریزاٹ اتے بین الاقوامی معیار دے ہوٹل قائم کرݨ آلیں کیتے حکومت ولوں سہولتاں بشمول ٹیکس اچ چھوٹ تے مبنی تجاویز پیش کیتیاں ونڄن تاں جو انہاں کوں وختی توں وختی چھکڑی شکل ݙتی ونڄ سڳے ، اے ڳال انہاں ٻدھ کوں آپݨی صدارت اچ نیشنل کوآرڈینیشن کمیٹی سیاحت دے اجلاس توں خطاب کریندے ہوئیں آکھی اے ۔ وزیر اعظم عمران خان اجلاس توں خطاب کریندے ہوئیں آکھیے جو ملک اچ سیاحت دا بے شمار پوٹینشل موجود اے، لوڑھ ایں ڳال دی اے جو ایں پوٹیشنل کوں مکمل طور تے بروئے کار گھن آیا ونڄے تے سیاحتی جاہواں تے بین الاقوامی معیار دیاں سہولتاں کوں یقینی بݨایا ونڄے ۔ وزیر اعظم آکھیے جو جہلم اتے ایندے نیڑے ریسٹ ہاؤسز تے ٻیاں تاریخی جہیں دا ذکر کریندے ہوئیں انہاں عمارتاں دی بحالی کیتے پبلک پرائیویٹ پارٹنرشپ ماڈل کوں استعمال اچ گھن آیا ونڄے ۔ وزیر اعظم ہدایت کیتی اے جو سیاحت دے حوالے نال زیر التوا معاملات کوں ترجیحی بنیاداں تے حل کیتا ونڄے ۔وزیر اعظم عمران خان آکھیے جو سیاحت دے شعبے اچ بے تحاشا مواقع موجود ہن جنہاں کوں استعمال اچ گھن آوݨ دی لوڑھ اے ،اجلاس اچ وزیر اطلاعات چوہدری فواد حسین، معاونِ خصوصی ڈاکٹر شہباز گل اتے متعلقہ وزارتاں دے سیکرٹریز شرکت کیتی۔ اجلاس اچ وزیر اعلیٰ خیبرپختونخوا محمود خان تے ٻئے صوبائی حکام وی ویڈیو لنک دے ذریعے اجلاس اچ شریک تھئے ۔
