ریاض۔25اکتوبر(اے پی پی)وزیراعظم عمران خان آکھیے جو ماحولیاتی مسائل نال انساناں کوں وݙے چیلنج ہین، جیکر ماحولیاتی مسائل کوں سنجیدہ نہ ڳھدا ڳیا تاں خطرناک نتائج نکل سڳدن۔ اے ڳالھ انہاں سعودی عرب دے دارالحکومت ریاض اچ گرین سعودی عرب فورم اتے گرین مشرق وسطیٰ سربراہ کانفرنس نال خطاب اچ آکھی۔ کانفرنس اچ ولی عہد شہزادہ محمد بن سلمان وزیراعظم عمران خان سودھا مختلف ملکاں دے سربراہواں اتے عالمی شخصیات دا استقبال کیتے۔ سعودی ولی عہد مڈل ایسٹ گرین انیشیٹو کیتے فاؤنڈیشن ٻݨاوݨ دا اعلان کیتے جو ماحولیاتی تبدیلیاں دے چیلنجز نال نبݨݨ کیتے فنڈ قائم کیتا ویسی۔ وزیراعظم عمران خان اپݨے خطاب اچ آکھیا جو ڄڳ دے 10 فیصد ملک 80 فیصد ماحولیاتی تبدیلیاں دے ذمہ دار ہین، پاکستان دے 10بلین ٹری منصوبے دا مقصد قدرتی طریقے نال ماحولیاتی چیلنجز تے قابو پاوݨ اے، پاکستان اچ کوئلے نال توانائی دا کوئی نواں منصوبہ شروع نہ کیتا ویسی اتے ہک ارب مینگروز لاعے ویسن جیرھے ودھ کاربن ڈائی اکسائیڈ جذب کریندن، 2030ء تئیں پاکستان 60 فیصد قابل تجدید توانائی ذرائع تے منتقل تھی ویسی، ماحول دوست کئی اقدامات کیتن، پاکستان او کلہا ملک اے جیڑھا ماحولیاتی تحفظ کیتے 44 فیصد سرمایہ کاری کریندا پئے، ماحول دے تحفظ کیتے ہزاراں لوکاں کوں روزگار ݙتے۔ ماحولیاتی تحفظ کیتے پورے ڄق کوں اقدامات کرݨے ہوسن اتے رل تے کم کرݨا ہوسی جو اے کہین ہک دا نئیں پورے ڄڳ دا مسلہ اے۔
