اسلام آباد۔24نومبر(اے پی پی)وزیر اعظم عمران خان ملک توں پولیو مکاوݨ کیتے 2 سالہ نیشنل ایمرجنسی ایکشن پلان دی منظوری ݙیندے ہوئے آکھیا جو اساں رل تے پولیو مکاوݨے، ایں سانڳے عالمی برادری پولیو مکاوݨ کیتے افغانستان دا ہتھ ونݙاوے۔ اے ڳالھ انہاں اپݨی اڳواݨی اچ قومی ٹاسک فورس انسداد پولیو دے اجلاس اچ الیندے آکھی۔ وزیراعظم آکھیا جو سیالے اچ پولیو کھنݙݨ دی شرح ڳھٹ ہوندی اے اتے ٻالاں دی ایمونائزیشن کیتے ایہو ٹھیک ویلھا اے، اساں رل تے پولیو وائرس مکاوݨے۔ انہاں آکھیا جو بین الاقوامی برادری کوں پولیو مکاوݨ کیتے افغانستان دا ہتھ ونݙاوݨا چاہیدے جو ہنگامی صورتحال سامݨے نہ آوے۔ اجلاس اچ آندے پنج سالاں کیتے 798.6 ملین ڈالر دا PC-I منظور کرݨ سانڳے تیاریاں اتے پولیو مکاوݨ کیتے عالمی اداریاں دی معاونت تے غور کیتا ڳیا اتے پولیو کیسز دی اڄوکی صورتحال دا جائزہ ڳھدا ڳیا۔ اجلاس اطمینان کیتے جو پولیو کیسز مکݨ سانڳے ورلڈ ہیلتھ آرگنائزیشن پاکستان کوں ” پولیو فری ” سرٹیفیکیٹ مل ویسی۔ ٹاسک فورس اجلاس اچ معاون خصوصی ڈاکٹر فیصل سلطان، گورنر خیبر پختونخوا شاہ فرمان، وزیر اعلی پنجاب سردار عثمان بزدار، وزیر اعلی خیبرپختونخوا محمود خان، وزیر اعلی گلگت بلتستان خالد خورشید، وزیر صحت بلوچستان سید احسن شاہ، وزیر اعظم آزاد جموں و کشمیر سردار عبدالقیوم خان نیازی، انجنئیر ان چیف پاکستان آرمی لیفٹیننٹ جنرل معظم اعجاز، سارے چیف سیکریٹریز، ڈبلیو ایچ او، یوینسف، سی ڈی سی، گاوی، بل اینڈ ملینڈا گیٹس فاونڈیشن اتے روٹری انٹرنیشنل دے اعلی حکام شرکت کیتی۔
