فیصل آباد۔26نومبر(اے پی پی)وزیراعظم دے معاون خصوصی سیاسی ابلاغ ڈاکٹر شہباز گل آکھیے جو مریم نواز اداریاں کوں بے نقاب کریندے کریندے آپ ڳندی تھی ڳئی اے، ملک اچ ڄاہ ڄاہ تے مافیاز دا راج اے، انہاں مافیاز ݙو وݙے تی وی اینکراں کوں حکومت دے خلاف ٹویٹس کیتے 50 لکھ روپے آفر کیتن، مافیا کوں نتھ ڳھتݨ تے شور مچدا پئے، کساناں کوں ودھ سوکھ ݙتا ویسی۔ اے ڳالھ انہاں 270 رب ماجھی وال ڈجکوٹ فیصل آباد اچ اپݨے ڈیرہ دا منݙھ بدھݨ، واٹر فلٹریشن پلانٹ اتے ٻئے تعمیراتی و ترقیاتی منصوبیاں دے افتتاح ویلھے میڈیا نال الیندے آکھی۔ انہاں آکھیا جو وزیراعظم واضح کر ݙتے جیکر سندھ حکومت کھاد مافیا دے خلاف کارروائی نہ کیتی تاں وفاقی حکومت آپ سندھ دیاں کھاد فیکٹریاں توں ساری کھاد چا ڳھنسی اتے کساناں کوں سستی ویچ ݙیسی، عمران خان شوگر مافیا کوں وی نتھ پاتی ہوئی اے، تاریخ اچ پہلی واری کاشتکاراں کوں حکومت دے مقررہ نرخاں توں ودھ ملھ اتے گنا ویچݨ تے ویلھے تے پیسے ملدے پین۔ انہاں آکھیا جو 70 سالاں اچ ملک اچ او ڳند پاتا ڳئے جیکوں صاف کرݨ کیتے عمران خان کوں آہدن جو او اے 3 سالاں اچ دھو ݙیون، بھل وزیراعظم عمران خان ݙینھ رات محنت کریندے پین اتے اے ڳند ملک توں تیکھے دھوویج ویسی۔
