اشک آباد ۔28نومبر (اے پی پی) صدر مملکت ڈاکٹر عارف علوی آکھیا جو اسلاموفوبیا ہک سنگین مسئلہ ٻݨ ڳئے، اسلامی برادری اسلاموفوبیا دے تدارک کیتے اقدامات کرے، گلوبل وارمنگ ہک اہم مسئلہ اے، درجہ حرارت اچ ڳھٹکی کیتے ترقی یافتہ ملک آپݨا کردار ادا کرن، افغانستان 40 سال جنگ دا سامݨا کیتے، افغانستان اچ امن دا قیام ٻہوں ضروری اے، افغانستان اچ امن تے استحکام کیتے امت مسلمہ کوں رل تے کم کرݨ دی لوڑھ اے، پاکستان 35 لکھ افغان مہاجرین دی میزبانی کریندا پئے، پوری دنیا دی معیشت کوں کورونا وبا پاروں متاثر تھئی اے۔ کووڈ 19 دی وباء پاروں عالمی مہانگ دا سامݨا اے۔ صدر مملکت ڈاکٹر عارف علوی اتوار کوں اشک آباد اچ اقتصادی تعاون تنظیم (ای سی او) دے 15 ویں اجلاس توں خطاب کریندیں ہوئیں آکھیا جو تجارتی تے اقتصادی راطبے ودھاوݨ ویلھے دی اہم لوڑھ اے، ایکو دا پلیٹ فارم اقتصادی رابطے ودھاوݨ اچ مدد ݙیسی۔ انہاں آکھیا جو ایکو دے رکن ملکاں اچ وسائل دی بہتات اے اتے اساݙی سانجھے ثقافت، ورثہ اتے مذہب اے۔ صدر عارف علوی آکھیا جو میں ایکو دے متفقہ وژن 2025ء اتے اسلام آباد اعلامیہ تے عملدرآمد کوں یقینی ٻݨاوݨا پوسی تانجو ایکو ٹریڈ اینڈ ڈویلپمنٹ بینک اتے ری انشورنس کمپنی ٻݨا تے خود مختاری حاصل کیتی ونڄے۔
