اسلام آباد ۔ 16 مئی (اے پی پی) وزیر اعظم آپنڑے اثاثیاں اتے ٹیکساں دی ادائیگی دی تفصیلات قومی اسمبلی اچ پیش کر ڈتی،پانامہ پیپرز دی تحقیقات سانگے جامع ٹرمز آف ریفرنس بنڑاونڑ سانگے قائد حزب اختلاف اتے پارلیمانی پارٹیاں دے سربراہواں تے مشتمل کمیٹی بنڑائی ونجڑ دا آکھیے۔لندن دے فلیٹ 2005اچ جدہ اچ 17ملین ڈالر دی لاگت نال ویچی گئی سٹیل ملز توں گھدے گئے،جدہ اسٹیل ملز اتے لندن اچ فلیٹس گھنڑ سانگے ہک روپیہ وی پاکستان توں باہر کائنی گئیا،اساڈا دامن صاف اے،کہیں آئینی،قانونی استثنیٰ دی لوڑھ کائنی،ماضی اچ کڑے اتے ہک پاسہ احتساب اچ سرخرو تھیسے،ایجھے الزامات لگدے رہندن تاں سیاستدان بے وقار اتے جمہوریت بے توقیر ہوسی،اساں چاہندوں جو کھیر دا کھیر اتے پانڑی دا پانڑی تھیوے،ساریاں کوں تلنڑاں اے تاں ہکی ترکڑی اچ تلنڑاں اے،اختیارات دے ناجائز استعمال،ٹیکس چوری،ارباں روپے دی قرضے معاف کراونڑ آلے،غیر قانونی طور تے پیسے باہر بھیجنڑ آلیاں دی کہانی عوام دے سامنڑے آونڑی چاہیدی اے۔2018ء دا پاکستان اج دے پاکستان توں ودھ روشن،پر امن مستحکم اتے توانا تھیسی۔سونوار کوں قومی اسمبلی اچ پالیسی بیان ڈیندیں ہوئیں وزیر اعظم آکھیا جو ایں سال اپریل دے پہلے ہفتے اچ پانامہ پیپرز بارے ہک رپورٹ میڈیا اچ آئی،اوندے اچ ایجھی آف شور کمپنیاں دی نشاندہی کیتی گئی جئیں اچ پاکستانیاں دا تعلق وی ڈسایا گئیا۔ایندے اچ واضح کیتا گئیا ہئی جو ضروری کائنی جو اے آف شور کمپنیاں غیر قانونی ہوون ۔میڈے ڈو پتراں دے ناں وی سامنڑے آئن جیڑھے جو گزریل کئی عرصے توں باہرلے ملک اچ اتے بئے لکھاں پاکستانیاں آلی کار اتھاں حل رزق کمیندن ۔انہاں آکھیا جو میڈے ڈو ساتھیاں مشورہ ڈتا جو کیونجو میڈا ناں اوندے اچ شامل کائنی ایں سانگے میکوں آپنڑے آپ کوں احتساب سانگے پیش نی کرنڑاں چاہیدا جڈانجو میں سمجھیا جو میڈے ٹبر دا ناں ایندے اچ شامل اے ایں سانگے قوم نال خطاب اچ اپوزیشن دے مطالبے توں پہلے ای سپریم کورٹ دے ریٹائرڈ جج دی سربراہی اچ کمیشن بنڑاونڑ دا اعلان کیتا۔ولا حاضر سروس چیف جسٹس دی سربراہی اچ کمیشن بنڑاونڑ دا مطالبہ کیتا تاں اوں تے وی 22اپریل کوں قوم نال خطاب اچ اے مطالبہ تسلیم کریندیں ہوئیں کمیشن بنڑاونڑ دا اعلان کیتا تاں اینکوں وی رد کر ڈتا گئیا اتے حکومتی ٹی او آرز مسترد کریندیں ہوئیں 15نکات ڈتے گئے۔اوندے اچ شاہد ای کہی سنجیندگی دا عنصر شامل ہووے۔اپوزیشن دے ٹی او آرزبے ایمانی اتے ہک بندے دے گرد گھمدن۔اوندے اچ آکھیا گئیا جو وزیر اعظم نال مراد نواز شریف ہوسن جئیں دا پانامہ پیپرز اچ ذکر ای کائنی اوندے تے فرد جرم لا ڈتی گئی۔انہاں آکھیا جو اساں نی چاہندے جو ملک کہیں کشمکش اچ رہے،ملک دی تعمیر تے ترقی سانگے ایں معاملے دی بے لاگ چھان بین ضروری اے ۔انہاں آکھیا جو اساڈا دامن صاف اے ،کہیں آئینی یا قانونی استثنیٰ دی لوڑھ کائنی۔اساں ماضی اچ وی ہک پاسہ احتساب اچ سرخرو تھیے اتے ہنڑ وی احتساب سانگے تیار ہیسے۔اساں چاہندوں جو بد عنوانی،اختیارات دے ناجائز استعمال،ٹیکس چوری،غیر قانونی طور تے پیسے باہر بھیجنڑ،ارباں روپے دے قرضے معاف کراونڑ آلیاں دی کہانی عوام دے سامنڑے آونڑی چاہیدی اے۔انہاں آکھیا جو کمیشن بارے چیف جسٹس دا خط مل گئے ،قانونی ماہرین ایںدا جائزہ گھندے پئن ۔وزیر اعظم قائد حز ب اختلاف اتے پارلیمانی لیڈراں دے مشورے نال پارلیمانی کمیٹی بنڑاونڑ دی پیشکش کیتی جئیں اچ جامع ٹرمز آف ریفرنس اتے بئے معاملیاں کوں اخیری شکل ڈتی ونجے تانجو بد عنوانی کرنڑ آلیاں کوں قانون دے کٹہرے اچ گھن آندا ونجے اتے ایں بارے کمیٹی جیڑھی تجویز ڈیسی سارے شواہد دی تفصیل انہاں دے سامنڑے اساڈے ولوں رکھ ڈتی ویسی۔انہاں آکھیا جو اج ہر پاکستانی تسلیم کریندے جو گزریل ترائے سالیں دے مقابلے اچ اجوکا پاکستان ودھ روشن،توانا اتے مستحکم اے اتے 2018ء دا پاکستان اج دے پاکستان توں کئی ودھ روشن ،توانا اتے مستحکم ہوسی ۔
