ملتان۔10جنوری (اے پی پی) 17ویں چولستان ڈیزرٹ جیپ ریلی 9 فروری کوں تھیسی جئیں کیتے گاݙیاں دی رجسٹریشن جاری اے۔ ایں بارے ٹورازم ڈویلپمنٹ کارپوریشن آف پنجاب ملتان دے ڈپٹی منیجر شیخ اعجاز اے پی پی نال ڳالھ مہاڑ کریندیں ہوئیں ݙسیا جو ٹی ڈی سی پی ولوں نو توں 13 فروری تئیں پنڄ ݙینھ دی جیپ ریلی دے انتظامات شروع کر ݙتے ڳئن۔ ایں بارے گاݙیاں دی آن لائن رجسٹریشن پہلی جنوری توں شروع کر ݙتی ڳئی اے جیڑھی جو 30 جنوری تئیں سنگل فیس نال جاری رہسی اتے پہلی فروری توں ڈبل فیس نال رجسٹریشن تھیسی۔ انہاں ݙسیا جو پری پیڈ کیٹگری کیتے سنگل فیس 30ہزار روپے، سٹاک کیٹگری کیتے 25ہزار روپے، سپانسر کیتے 35ہزار روپے اتے سٹاک سپانسر کیٹگری کیتے 30ہزار روپے مقرر کیتی ڳئی اے۔ انہاں ݙسیا جو جیپ ریلی اچ 125 جیپ ڈرائیور حصہ ڳھن سڳدن۔
