لاہور۔1مارچ (اے پی پی):وزیر اعظم عمران خان اورسیز پاکستانیاں کوں ملکی صنعتاں اچ سرمایہ کاری دی دعوت اتے پنج سال کیتے ٹیکسز توں استثنیٰ ݙیوݨ دا اعلان کریندے ہوئیں آکھیے جو ماضی اچ جیڑھیاں وی حکومتاں آئن انہاں کوں پتہ ہی نہ ہئی جو ملک دا پاسہ کیڑھے پاسے ہووݨا چاہیدے تے اساں مختلف رستے تے ٹردے رہیے ، امداد تے قرضہ منڳݨ آلیں دی دنیا اچ کوئی عزت نی ہوندی جݙاں کوئی ملک ہتھ چا تے پھردے تاں کوئی اساکوں امداد ݙیوے تاں ول اینکوں آپݨی خارجہ پالیسی بدالݨی پوندی اے ،اپݨے مفادات دے خلاف ݙوجھیں دیاں جنگاں اچ شرکت کرݨی پوندی اے ، ساݙے ملک اچ سمال اینڈ میڈیم انڈسٹریز دی ترقی اچ بے پناہ رکاوٹاں پاتیاں ڳئن لیکن ہݨ انہاں کوں ختم کرتے مراعات اتے سہولتاں ݙیندے پیوں آئی ٹی انڈسٹری کوں وی مراعات ݙیندے پیوں ایں توں پاکستان تکھے اتے ویسی ،انڈسٹریز کیتے جنہاں مراعات اتے سہولتاں دا اعلان اڄ کریندے پیوں اساکوں او پہلے ݙینھ کر ݙیوݨا چاہیدا ہئی ، اے ڳالھ انہاں منڳل کوں گورنر ہائوس لاہور اچ انڈسٹریل پیکج دے حوالے نال منعقدہ تقریب توں خطاب کریندے ہوئیں آکھی اے ، ایں موقع تے گورنر پنجاب چوہدری محمد سرور، وزیر اعلی پنجاب سردار عثمان بزدار ،وفاقی وزیر اطلاعات و نشریات چوہدری فواد حسین، وفاقی وزیر خسرو بختیار،شفقت محمود،حماداظہر،صدر ایف پی سی سی آئی عرفان اقبال شیخ، وفاقی و صوبائی کابینہ دے ارکان سودھے بزنس کمیونٹی دی سرکردہ شخصیات وی موجود ہن ۔ وزیر اعظم عمران خان آکھیے جو وفاقی وزیر صنعت و پیداوار خسرو بختیار تساکوں ساری تفصیلات دا ݙسائے ۔وزیر اعظم آکھیے او جݙاں کرکٹ کھیݙدے ہن تاں سمݨ توں پہلے آپݨا احتساب کریندے ہن جو میں جیڑھا میچ کھیݙیے او کیویں کھیݙیے تے میکوں کیویں کھیݙݨا چاہیدا ہئی تے میں ایں سوچ دے پورا تھیوݨ تئیں سمدا نہ ہامی ، انہاں آکھیے جݙاں توں ساݙی حکومت آئی اے میں سوچینداں جو اساکوں آتے کیا اقدامات کرݨے چاہیدن ہن تاں ساریں توں وݙی کامیابی اے ہے جو پیکج اساں اڄ ݙتے او بزنس کمیونٹی کیتے پہلے ݙینھ توں ہی ݙیوݨا چاہیدا ہئی ، انہاں آکھیے کوئی وی ملک کݨک تے سبزیاں اتے ویچ تے ترقی نی کرسڳدا اڳوں نی ودھ سڳدا بلکہ ملک صنعتاں دی بنیاد تے اڳوں ودھدن ،جݙاں انڈسٹریز دی پیداوار ودھدی اے تاں ایندے اچ جدت آندی اے ،اتنا ہی ایں ملک دی دولت ودھدی اے ، مینو فیکچررز اتے انڈسٹریز دے بغیر کݙاہیں کوئی ملک عظیم نی بݨ سڳدا ۔
