پورے ملک سودھے سرائیکی وسیب اچ “سرائیکی ثقافتی ݙینھ “جوش تے جذبے نال منایا ڳئے

ملتان۔6مارچ (اے پی پی) پورے ملک سودھے سرائیکی وسیب اچ سرائیکی ثقافت دا ݙینھ جوش تے جذبے نال منایا ڳئے ، ملتان ، مظفر گڑھ، ڈیرہ غازی خان، بہاولپور ، رحیم یار خان ، لیہ ، چوک اعظم ،تونسہ ، راجن پور ، احمد پور شرقیہ ،سودھے کراچی اچ وسݨ آلی سرائیکی کمیونٹی سرائیکی کلچر ڈے شایان شان نال منایا

۔سرائیکی کلچر ڈے دے موقع تے شہر اولیا اچ رنگا رنگ تقریبات دا انعقاد کیتا ڳئے۔دول، بین تے نغارے دیاں سوہݨیاں تے من موہݨیاں دھناں تے سرائیکی جھمر سماں ٻدھ ݙتا ۔

شہر ملتان اچ نیلے رنگ دی سرائیکی اجرک دی بہار آڳئی ، ٻال ، نینگر ، ٻڈھے تے تریمتاں ساریں سرائیکی اجرک ڳل اچ پاتے ماحول کوں نیلڳوں کرݙتا ۔ملتان ٹی ہاؤس ، تے آرٹ کونسل ملتان اچ سرائیکی شعرا ، ادیباں ، دانشوراں صحافیاں ، تے گلوکاراں وݙی تعداد اچ شرکت کیتی تے بہوں سوہݨے انداز اچ آپݨی ثقافت نال محبت دا اظہار کیتا ۔