مظفرگڑھ۔12ستمبر (اے پی پی):عالمی ادارہ صحت دے وفد دا پلیتھا ماہیپالا دی سربراہی اچ مظفرگڑھ دا دورہ،سیلاب متاثرین کیتے منی ایمبولینسز، ضروری دوائیں تے ٹینٹ عطیہ کیتے۔کمشنر ڈیرہ غازیخان ڈویژن لیاقت علی چٹھہ، ڈپٹی کمشنر مظفرگڑھ علی عنان قمر،ڈپٹی کمشنر ڈی جی خان محمد انور بریار اتے ڈپٹی کمشنر راجن پور عارف رحیم وی وفد دے رلے ہن، ایں موقع تے کمشنر ڈیرہ غازیخان وفد کوں ݙسایا جو اڄوکے مینھ جنوبی پنجاب دے ضلعیں اچ وݙی تباہی تھئی اے،مینھ دے نتیجے اچ آوݨ آلے سیلابی ریلیں توں جانی تے مالی ضیان دے نال مال مویشی تے زراعت دا وی ٻہوں ضیان تھئے ،انتظامیہ آپݨے وسائل موجب بہترین ریسکیو آپریشن کیتا تے ودھ توں ودھ متاثرینِ کوں ریلیف ݙتے ،انہاں مزید آکھیے جو ضلعی انتظامیہ بالخصوص ریسکیو 1122دی خدمات کوں بھلایا نی وںڄ سڳدا ،سیلاب دے دوران تے سیلاب دے بعد صحت عامہ دی صورتحال تے خصوصی توجہ ݙتی ویندی پئی اے تے ہیضہ، ڈینگی ،ملیریا تے ٻئے وبائی امراض توں بچݨ کیتے عملی اقدامات کیتے ویندے پئن ،نمائندہ عالمی ادارہ صحت ڈاکٹر پلیتھا ماہیپالا ایں موقع تے آکھیے جو اڄوکے مینھ تے سیلاب توں پاکستان دے ٻہوں سارے علاقیں اچ وݙی تباہی تھئی اے ، انتظامیہ باہم رابطے اتے مناسب انتظامات توں ایندا مقابلہ کیتے جیڑھا جو قابل تعریف اے، انہاں مزید آکھیے جو سیلاب دے بعد عالمی ادارہ صحت دا فوکس صحت عامہ تے ہے تے سیلاب متاثرین کوں وبا تے بیماریاں توں بچاوݨا اے ، انہاں آکھیے جو عالمی ادارہ صحت دیاں ٹیماں خود سیلاب متاثرین تئیں پڄسن ، انہاں کمشنر ڈیرہ غازیخان ڈویژن کوں آکھیے جو سیلاب متاثرین کیتے میڈیکل کیمپس قائم کیتے ونڄن تے انہاں میڈیکل کیمپس تے ساریاں بنیادی سہولتاں ݙتیاں ونڄن ۔
