پاکستان دے سیلاب متاثرین دی بحالی کیتے جنیوا اچ بین الاقوامی کانفرنس اڄ تھیسی

جنیوا۔9جنوری(اے پی پی):پاکستان دے سیلاب متاثرین دی بحالی کیتے جنیوا، سویٹزرلینڈ اچ اہم ترین بین الاقوامی کانفرنس اڄ سنوار کوں تھیسی ۔ وزیراعظم آفس دے میڈیا ونگ توں جاری بیان موجب کانفرنس دے مختلف سیشن ہوسن ، پارٹنرز دی طرفوں امداد دے اعلانات تھیسن تے کانفرنس “موسمیاتی تبدیلیاں دے مقابلے دی صلاحیت رکھݨ آلا پاکستان” دے عنوان توں تھیندی پئی اے ۔ کانفرنس دا آغاز سیلاب توں بحالی کیتے پاکستان کوں وسائل دی فراہمی دی نشست نال تھیسی ۔ پاکستان اچ سیلاب دی تباہی، نقصانات، امداد اتے بحالی متعلق خصوصی وڈیو وی کانفرنس اچ ݙکھائی ویسی ۔ وزیر خارجہ بلاول بھٹو زرداری کانفرنس دے شرکا دا شکریہ ادا کریسن ۔ پاکستان اچ اقوام متحدہ دے ریزیڈنٹ کوآرڈینیٹر جولین ہارنیس تقریب کوں کنڈکٹ کریسن ۔ وزیراعظم شہباز شریف اپݨے خطاب اچ کانفرس کوں سیلاب توں تھیوݨ آلی تباہی، بحالی دے لائحہ عمل متعلق ݙسیسن۔ اقوام متحدہ دے سیکریٹری جنرل انتونیو گوٹیرس، فرانس دے صدر ایمانیول میکرون، ترکی دے صدر رجب طیب اردوان کانفرنس توں خطاب کریسن ۔ ناروے دے وزیراعظم جوناس گار سٹور اتے یورپی کمیشن دی صدرارسلا وون ڈیر لیین کانفرنس توں وڈیو خطاب کریسن ۔ سویٹزرلینڈ دے فیڈرل قونصلر اتے خارجہ امور دے فیڈرل ڈیپارٹمنٹ دے سربراہ اگنازیو کیسس کانفرنس توں خطاب کریسن ۔ اقوام متحدہ دے سیکریٹری جنرل تے وزیراعظم شہباز شریف مشترکہ پریس کانفرنس کریسن ۔ کانفرنس دے موقع تے وزیراعظم شہباز شریف دی مختلف ملکاں دے رہنماواں تے اہم شخصیات نال ملاقاتاں تھیسن ۔ سویٹزرلینڈ دے فیڈرل قونصلر اگنازیو کیسس، برطانیہ دے سٹیٹ منسٹر ترقی اینڈریو مچل، ازبکستان دے وزیر خارجہ بختیار ساجدوف وزیراعظم شہباز شریف نال ݙو پاسے ملاقاتاں کریسن ۔ وزیراعظم شہباز شریف نال چائنا انٹرنیشنل کوآپریشن ایجنسی دے چیئرمین لو زائو ہوئی اتے اسلامی ڈویلپمنٹ بینک دے صدر ڈاکٹر محمد الجاسر وی ملاقات کریسن ۔ بین الاقوامی ترقی دے امریکی ادارے (یوایس ایڈ) دی ڈپٹی ایڈمنسٹریٹر ایزابیل کولمین وزیراعظم نال ملاقات کریسن ۔ورلڈ بینک ایشیا ریجن دے نائب صدر مارٹن ریزر وی وزیراعظم نال ملاقات کریسن ۔