کݨک دے وافر ذخائر موجود ہن،حکومت اٹے دی مصنوعی قلت توں مہانگ پیدا کرݨ آلیں کوں قرار واقعی سزا ݙیسی،وزیراعظم شہبازشریف

اسلام آباد۔12جنوری(اے پی پی):وزیراعظم محمد شہبازشریف آکھیے جو ملک اچ کݨک دے وافر ذخائر موجود ہن ۔ ملک اچ کہیں کوں کݨک دی مصنوعی قلت پیدا کرتے ناجائز منافع خوری دی اجازت نہ ݙیسوں، حکومت غریب عوام کیتے اٹے دی مصنوعی قلت توں مہانگ پیدا کرݨ آلیں کوں قرار واقعی سزا ݙیسی ۔ وزیراعظم آفس دے میڈیاونگ توں جاری بیان موجب اے ڳالھ وزیراعظم اپݨی زیرصدارت ملک اچ کݨک تے اٹے دی صنوعی قلت اتے ذخیرہ اندوزاں و ناجائز منافع خوری دے حوالے نال اعلی سطح دے ہنگامی اجلاس اچ ڳالھ مہاڑ کریندے ہوئیں آکھی اے ۔ اجلاس اچ وفاقی وزیرِ غذائی تحفظ طارق بشیر چیمہ، مشیرِ وزیرِ اعظم احد چیمہ، متعلقہ وفاقی اعلی حکام اتے صوبائی چیف سیکرٹریز شرکت کیتی۔ اجلاس اچ وزیراعظم آکھیے ملک اچ کݨک دے وافر ذخائر موجود ہن۔ ملک اچ کہیں کوں کݨک دی مصنوعی قلت پیدا کرتے ناجائز منافع خوری دی اجازت نہ ݙیسوں ۔ وزیراعظم ہدایت کیتی اے جو صوبے اپݨے اتے پاسکو دے ذخائر توں کݨک دی فلور ملز تئیں وختی رسد یقینی بݨاون ، صوبے کݨک دی وختی ترسیل کیتے اپݨی گورننس بہتر بݨاون۔ متعلقہ وفاقی و صوبائی ادارے اٹے اتے کݨک دے ذخیرہ اندوزاں دے خلاف سخت اقدامات کریسن۔حکومت غریب عوام کیتے اٹے دی مصنوعی قلت توں مہانگ پیدا کرݨ آلیں کوں قرار واقعی سزا ݙیسی۔ وزیراعظم آکھیے گزریل پنج ݙینھ اچ حکومت دے اقدامات پاروں اٹے دے 40 کلو دے تھیلے دی قیمت تقریباً 1000 روپے گھٹ تھئی اے جیڑھی جو چنڳی ڳالھ اے ۔اجلاس اچ وزیرِ اعظم ملک اچ کݨک دے موجودہ ذخائر دا جائزہ ڳھدا ۔ اجلاس کوں ݙسایا ڳئے جو ملک اچ کݨک دے وافر ذخائر موجود ہن تے صوبیں کوں ہدایت کیتی ویندی اے جو پاسکو دے ذخائر توں فلور ملز تئیں کݨخ دی ترسیل مزید تکھی کیتی ونڄے ۔