وزیر اعظم شہباز شریف نال ملاقات، متحدہ عرب امارات دے صدر دا پاکستان دے 2 ارب ڈالر دے اڄوکے قرضے اچ مدت ودھا ݙتی، ہک ارب ڈالر ودھیکی قرضہ ݙیوݨ تے اتفاق

ابوظہبی۔12جنوری (اے پی پی) متحدہ عرب امارات دے صدر شیخ محمد زاید النہیان دا پاکستان دے 2 ارب ڈالر دے اڄوکے قرضے اچ مدت ودھا ݙتی، ہک ارب ڈالر ودھیکی قرضہ ݙیوݨ تے اتفاق کیتے۔ وزیراعظم آفس دے میڈیا ونگ توں جاری پریس ریلیز موجب وزیراعظم محمد شہباز شریف خمیس کوں ابوظہبی دے دورہ دے پہلے ݙینھ متحدہ عرب امارات دے صدر شیخ محمد زاید النہیان نال ملاقات کیتی۔ یو اے ای دے صدر وزیراعظم دا ابوظہبی اچ خیر مقدم کریندیں ہوئیں پاکستان دی ترقی تے خوشحالی کیتے نیک تمناواں دا اظہار کیتا۔ انہاں ݙوہیں ملکاں وچال تاریخی تعلقات اتے متحدہ عرب امارات اچ پاکستانی کمیونٹی دی خدمات دی تعریف کیتی۔ وزیراعظم محمد شہباز شریف برادر ملک دے دورہ دی دعوت تے متحدہ عرب امارات دے صدر دا شکریہ ادا کیتا۔ ایں موقع تے ݙوہیں رہنماواں پاکستان اتے متحدہ عرب امارات وچال اڄوکے برادرانہ تعلقات تے ڳالھ کیتی اتے تجارت، سرمایہ کاری اتے توانائی دے شعبیاں اچ تعلقات ودھاوݨ دی خواہش کیتی۔ ایں موقع تے متحدہ عرب امارات دے صدر دا پاکستان دے 2 ارب ڈالر دے اڄوکے قرضے اچ مدت ودھا ݙتی، ہک ارب ڈالر ودھیکی قرضہ ݙیوݨ تے اتفاق کیتا۔ وزیراعظم شہبا ز شریف یو اے ای دے صدر کوں دورہ پاکستان دی دعوت ݙتی جئیں تے انہاں رضامندی ݙکھائی جئیں کیتے تاریخ سفارتی ذرائع نال طے کیتی ویسی۔