پاکستان کوں ملݨ آلی امداد موسمیاتی تبدیلیاں نال نبݨݨ تے سیلاب متاثرین دی بحالی کیتے خرچ کیتی ویسی ، ترجمان دفتر خارجہ

اسلام آباد۔13جنوری(اے پی پی) دفتر خارجہ دی ترجمان ممتاز زہرا بلوچ آکھیے پاکستان تے متحدہ عرب امارات تجارت، سرمایہ کاری اتے توانائی دے شعبیں اچ سانجھے فیدہ مند تعاون کوں مزید مضبوط کرݨ تے اتفاق کیتے، حکومت پاکستان تے اقوام متحدہ دی مشترکہ میزبانی اچ تھیوݨ آلی جنیوا کانفرنس اچ پاکستان کوں ملݨ آلی امداد موسمیاتی تبدیلیاں نال نبݨݨ تے سیلاب متاثرین دی بحالی کیتے خرچ کیتی ویسی ۔ ہفتہ وار پریس بریفنگ اچ انہاں آکھیے جو وزیراعظم محمد شہباز شریف متحدہ عرب امارات دا ݙو ݙینھ دورہ متحدہ عرب امارات دے صدر شیخ محمد بن زاید النہیان دی دعوت تے کریندے پئن ، وزیر اعظم دورے اچ متحدہ عرب امارات دے صدر اتے وزیر اعظم توں علاوہ متحدہ عرب امارات دے نائب صدر اتے دبئی دے حکمران شیخ محمد بن راشد آل مکتوم نال ملاقاتاں کیتیاں ۔ انہاں آکھیے ݙوہیں ملکاں دے رہنماواں انہاں ملاقاتاںاچ پاکستان تے متحدہ عرب امارات دے درمیان ݙوطرفہ تعلقات دا جائزہ ڳھدا تے تجارت، سرمایہ کاری اتے توانائی دے شعبیں اچ سانجھے فیدہ مند تعاون کوں مزید مضبوط کرݨ تے اتفاق کیتے ۔ دفتر خارجہ دی ترجمان آکھیے جو فریقین ݙو طرفہ سرمایہ کاری تعاون کوں وسعت ݙیوݨ ، شراکت داری کوں ودھاوݨ تے سرمایہ کاری ودھاوݨ تے اتفاق کیتے۔ انہاں آکھیے جو وزیراعظم تجارت اتے سرمایہ کاری کوں ودھاوݨ دے مواقع تلاش کرݨ کیتے اڄ پاکستانی اتے اماراتی تاجراں اتے سرمایہ کاراں نال ملاقات کریندے پئن ، وزیر اعظم متحدہ عرب امارات دا ݙو ݙینھ دا دورہ مکمل کرتے اڄ ہی وطن واپس پجسن ۔ ممتاز زہرا بلوچ آکھیے اڄوکے ہفتے پاکستان جنیوا اچ ڈونرز کانفرنس منعقد کیتی جیں اچ عالمی برادری اتے مالیاتی اداریں پاکستان دے سیلاب متاثرین کیتے دل کھول تے مدد کیتی اے ۔ انہاں آکھیے امداد موسمیاتی تبدیلیاں نال نبݨݨ تے سیلاب متاثرین دی بحالی کیتے خرچ کیتی ویسی ۔ ترجمان آکھیے پاکستان کابل اچ تھیوݨ آلی دہشت گردی دی مذمت کریندے ہوئیں آکھیے دہشت گردی ݙوہیں ملکاں کیتے خطرہ اے ، انہاں آکھیے پاکستان اوکھے ویلھے افغانستان نال اظہار یکجہتی کریندے ۔ دفتر خارجہ دی ترجمان بھارت دے غیر قانونی زیر تسلط جموں و کشمیر اچ بھارتی فوج دے ہتھوں انسانی حقوق دی سنگین پامالیاں دی مذمت کریندے ہوئیں آکھیے پاکستان کشمیریاں دی ہر سطح تے حمایت جاری رکھیسی۔