امریکا اچ پاکستان دے سفیر مسعود خان کوں ڈاکٹر مارٹن لوتھر کنگ جونیئر لیگیسی ایوارڈ ݙتا ڳئے

واشنگٹن۔16جنوری(اے پی پی):امریکا اچ پاکستان دے سفیر مسعود خان کوں سفارت کاری اتے بین الاقوامی خدمات کیتے ڈاکٹر مارٹن لوتھر کنگ جونیئر لیگیسی ایوارڈ ݙتا ڳئے ۔ اے ایوارڈ 50 دے ݙھاکے دے ادھ اچ امریکن بیپٹسٹ منسٹر ،شہری حقوق دے رہنما اتے کارکن ڈاکٹر مارٹن لوتھر کنگ جونیئر دے ناں تں منسوب کیتا ڳئے جیڑھا جو گزریل ݙینھ انسٹی ٹیوٹ فار دی ایڈوانسمنٹ آف ملٹی کلچرل اینڈ مینارٹی میڈیسن(آئی اے ایم ایم ایم )دے زیراہتمام آنجہانی ڈاکٹر مارٹن لوتھر تکنگ جونیئر دی زندگی اتے میراث کیتے 31ویں انٹرنیشنل سلیوٹ دے موقع تے پاکستانی سفیر مسعود خان کوں ݙتا ڳئے ۔ پاکستانی سفارتخانے موجب ایوارڈ دی تقریب ویلارڈ انٹر کانٹی نینٹل واشنگٹن ڈی سی ہوٹل اچ منعقد کیتی ڳئی جیں اچ امریکی ارکان کانگرس، سفارتکاراں کمیونٹی لیڈرز امریکی ماہرین تعلیم سودھے 150توں ودھ لوکاں شرکت کیتی ۔اے ایوارڈ ہر سال 15جنوری کوں ڈاکٹر مارٹن لوتھر کنگ جونیئر دی سالگرہ دے موقع تے انہاں دے اعزاز اچ منعقدہ تقریبات اچ مختلف شخصیات کوں ݙتا ویندے ۔ پاکستانی سفیر مسعود خان کوں مارٹن لوتھر کنگ انٹرنیشنل سلیوٹ دا اعزازی چیئرمین وی نامزد کیتا ڳئے ۔ اڄوکے سال اے ایوارڈ جنہاں ٻئی شخصیات کوں ݙتا ڳئے انہاں اچ امریکی ریاست میری لینڈ دے سینیٹر کرس وان ہولن، میری لینڈ دے سیکرٹری آف سٹیٹ جان ووبن ستمھ ،اے ایل ایس اے سی سینٹ جوڈ چلڈرنز ریسرچ ہسپتال دے صدر اتے سی ای او رچرڈ شیڈیک اتے کارپوریٹ سٹیزن شپ گیلیڈ سائنسز پبلک افیئرز دے پبلک افیئرز دے سینئر ڈائریکٹر شینیل میگ گوئے شامل ہن۔ ایں موقع تے پاکستانی سفیر مسعود خان ایوارڈ تے انسٹی ٹیوٹ فار دی ایڈوانسمنٹ آف ملٹی کلچرل اینڈ مائینارٹی میڈیسن(آئی اے ایم ایم ایم )دا شکریہ ادا کریندے ہوئیں آکھیے انہاں کیتے معروف شخصیت ڈاکٹرمارٹن لوتھر کنگ اتے انہاں دے مشن نال جڑݨ فخر دی ڳالھ اے ۔ انہاں آکھیے ݙتا ڳیا اعزاز اصل اچ پاکستان تے ایندے عوام دا اعزاز اے ۔