کراچی تے حیدرآباد دی عوام ووٹ دی طاقت نال نام نہاد مقبول لیڈراں دا پول کھول ݙتے ،بلاول بھٹو زرداری

کراچی۔17جنوری(اے پی پی) پاکستان پیپلزپارٹی دے چیئرمین و وزیر خارجہ بلاول بھٹو زرداری آکھیے جو کراچی تے حیدرآباد دی عوام ووٹ دی طاقت نال نام نہاد مقبول لیڈراں دا پول کھول ݙتے ،بلدیاتی انتخابات دے بعد ثابت تھی ڳئے جو پیپلزپارٹی سندھ دے شہری اتے دیہاتی علاقیں دی واحد ساریں توں وݙی جماعت اے ، کراچی تے حیدرآباد دے عوام دا شکریہ ادا کرینداں انہاں جیالے امیدواراں کوں ووٹ ݙے تے منتخب کیتے۔ بلاول ہائوس توں جاری بیان موجب اے ڳالھ انہاں الیکشن کمیشن دی طرفوں بلدیاتی انتخابات دے نتائج دے اعلان دے بعد آکھی اے ۔ بلاول بھٹو زرداری آکھیے پیپلزپارٹی وفاق دی زنجیر اے تے ملک دے سارے طبقات تے مشتمل کراچی اچ پی پی دی جت پورے ملک دی فتح اے،کراچی اتے حیدرآباد دی ترقی کیتے ساریاں سیاسی اکائیاں دا رل تے کم کرݨ عوام دی خوشحالی دی وجہ بݨسی ۔چیئرمین بلاول بھٹو زرداری مزید آکھیے عوام پاکستان پیپلزپارٹی دے امیدواراں کوں منتخب کرتے سندھ حکومت دی کارکردگی تے اعتماد دا اظہار کیتے،جئے بھٹو دے نعریں توں گجدے کراچی اتے حیدرآباد نفرت دی سیاست کرݨ آلیں کوں مسترد کرݙتے ۔بلاول بھٹو زرداری آکھیےبلدیاتی انتخاب جتݨ آلے سارے جیالے امیدواراں دی ذمہ واری اے جو او عوام دے اعتماد تے پورا لہݨ کیتے آپݨی بہترین صلاحیتاں دا مظاہرہ کرن۔واضح رہے جو کراچی اچ ساریں توں ودھ یونین کونسل چیئرمین پیپلزپارٹی دے کامیاب تھئن ݙوجھے نمبر تے جماعت اسلامی اے۔