نینگرپاکستان دا اثاثہ ہن جنہاں دی فلاح تے بہبود نال ملکی ترقی نال جڑی اے، وزیراعظم شہباز شریف

اسلام آباد۔9فروری (اے پی پی) وزیراعظم محمد شہباز شریف پی ایم یوتھ لون سکیم دی کارکردگی اتے کم دی رفتار کوں جانچݨ بارے سٹیرنگ کمیٹٰ ٻݨیندیں ہوئیں 30 جون 2023 تئیں پی ایم یوتھ لون سکیم توں 30 ارب روپے تئیں قرضے ݙیوݨ دا ہدف پورا کرݨ دی ہدایت کیتی اے۔ وزیراعظم آکھیا جو نینگر پاکستان دا ثاثہ ہن جئیں دی فلاح و بہبود نال ملکی ترقی جڑی اے۔ نینگراں کوں سوکھی شرطاں تے قرضے ݙتے ونڄن۔ او خمیس کوں پرائم منسٹر یوتھ لونز سکیم بارے اہم جائزہ اجلاس دی صدارت کریندے پے ہن۔ اجلاس اچ پرائم منسٹر یوتھ لون سکیم دی ہݨ تئیں دی کارکردگی دا جائزہ ڳھدا ڳیا۔ اجلاس دے شرکاء نال ڳالھ مہاڑ کریندیں ہوئیں وزیراعظم آکھیا جو حکومت نینگراں اچ انٹر پرینیور شپ اتے روزگار دے ودھارے بارے اقدامات کریندی پی اے ۔ وزیراعظم پی ایم یوتھ لون سکیم دی کارکردگی اتے کم دی رفتار بارے ہک سٹیئرنگ کمیٹی ٻݨاوݨ دی ہدایت کیتی جئیں دی سربراہی وزیراعظم خود کریسن۔ کمیٹی اچ وفاقی وزیر خزانہ تے محصولات اسحاق ڈار وی شامل ہوسن۔ اجلاس کوں ݙسیا ڳیا جو پرائم منسٹر یوتھ لون سکیم دا بنیادی مقصد نینگراں اچ انٹر پرینیور شپ ودھاوݨ اتے انہاں کیتے روزگار دے موقع ݙیوݨ اے۔ ایں سکیم توں 2013 توں ہݨ تئیں 54 ہزار لوکاں کوں 73.55 ارب روپے دا قرضہ ݙتا ڳے۔ اجلاس کوں ݙسیا ڳے جو پی ایم یوتھ لون سکیم دے اڄوکے پورٹل دا آغاز 24 جنوری 2023 کوں کیتا ڳے۔ ایں سکیم دے تحت 18 توں 45 سال دے لوکاں کوں 45 ݙینھ دے اندر سوکھی شرطاں تے قرضہ ݙتا ویسی۔ ایں سکیم اچ 25 فیصد کوٹہ تریمتیں کیتے رکھیا ڳے۔ ٻݨائی ڳی کمیٹی اچ وزیر مملکت برائے خزانہ عائشہ غوث پاشا، وزیراعظم دی معاون خصوصی برائے امور نوجوانان شزا فاطمہ، وفاقی سیکرٹری اطلاعات و نشریات ، وفاقی سیکرٹری تخفیف غربت و سماجی تحفظ ، بانی اخوت فاؤنڈیشن امجد ثاقب ، گورنر سٹیٹ بینک آف پاکستان ، صدور نیشنل رُورَل سپورٹ پروگرام ، بینک آف پنجاب ، حبیب بینک لمیٹڈ ، زرعی ترقیاتی بینک لمیٹڈ اتے بینک الفلاح لمیٹڈ شامل ہوسن۔ اجلاس اچ وزیراعظم دی معاون خصوصی برائے امور نوجوانان شزا فاطمہ، بینکاں اتے مائیکرو فنانس اداریاں دے صدور اتے نمائندے شریک تھیے۔