وزیر اعظم شہباز شریف 16 اتے17 فروری کوں ترکیہ دا دورہ کریسن، ترجمان دفتر خارجہ

اسلام آباد۔16فروری (اے پی پی) ترجمان دفتر خارجہ آکھیا جو چھی فروری کوں آوݨ آلے شدید زلزلے پاروں ترک عوام نال یکجہتی اتے حمایت دے خصوصی اظہار کیتے وزیر اعظم شہباز شریف 16 اتے17 فروری کوں ترکیہ دا دورہ کریسن۔ دفتر خارجہ دی ترجمان خمیس کوں جاری بیان اچ آکھیا جو انقرہ اچ اپݨے قیام اچ وزیراعظم ترکیہ دے صدر رجب طیب ایردوان نال ملاقات کریسن اتے زلزلے پاروں قیمتی جاناں دے ضیان تے تھیوݨ آلے نقصان تے پاکستانی قوم ولوں ذاتی طور دلی تعزیت کریسن۔ ترجمان موجب وزیراعظم اوکھے ویلھے ترک عوام دی نال کھڑݨ اتے جاری امدادی کوششاں اچ ہر تعاون جاری رکھݨ دے پاکستان دے پکے عزم دا اعادہ کریسن۔ بیان اچ آکھیا ڳیا جو وزیراعظم جنوبی ترکیہ اچ زلزلے توں متاثرہ علاقیاں دا دورہ وی کریسن اتے علاقے اچ تعینات پاکستانی سرچ اینڈ ریسکیو ٹیماں دے نال نال زلزلے اچ بچݨ آلیاں نال ڳالھ مہاڑ وی کریسن۔