نیب آرڈیننس 1999 دے تحت فوج دے حاضرسروس افسران توں علاوہ کہیں کوں استثنا حاصل کائنی ، وزیراعظم دے معاون خصوصی قانونی اصلاحات و احتساب عرفان قادر دی پریس کانفرنس

اسلام آباد۔8جون(اے پی پی):وزیراعظم دے معاون خصوصی قانونی اصلاحات و احتساب عرفان قادر آکھیے نیب آرڈیننس 1999 دے تحت فوج دے حاضرسروس افسران توں علاوہ کہیں کوں استثنا حاصل کائنی ،این سی اے 190 ملین پائونڈ  کیس اچ سابق وزیراعظم عمران خان ، انہاں دی ذال ، فرح گوگی  اتے انہاں دے گھر آلے دے خلاف مزید ثبوت سامݨے آئن ،فرح گوگی اتے اوندے شوہر دے اکائونٹ اچ ساڈھے 4ارب روپے دی ٹرانزیکشن تھئی ، انہاں کوں وطن واپس گھن آوݨ کیتے کوششاں جاری ہن ۔ اے ڳالھ انہاں پریس کانفرنس کریندے ہوئیں آکھی اے ۔ انہاں آکھیے پاکستان سودھے پوری دنیا کوں بدعنوانی دا سامݨا اے،ایویں دنیا اچ کرپشن اتے بدعنوانی دی وجہ توں احتساب دا عمل وی جاری اے، بدعنوانی او فعل اے جیں توں کہیں کوں ناجائز فیدہ یا نقصان تھیوے تے قانون ایندی اجازت نہ ݙیندا ہووے ، اقوام متحدہ دے بدعنوانی کوں روکݨ کیتے کنونشن تے پاکستان سودھے پوری دنیا دے سارے ملکاں دستخط کررکھئے ، دنیا دے سارے ملک بدعنوانی مکاوݨ کیتے ہم آہنگی دے خواہاں ہیسے، پاکستان بدعنوانی مکاوݨ کیتے ٻئے ملکاں دے نال رل تے کام کریندا پئے ۔ انہاں آکھیے نیب آرڈیننس 1999 دا مقصد ملک توں لٹی ہوئی دولت واپس گھن آوݨا اے ، سیاستداناں اتے بیوروکریٹس دا احتساب تاں تھیندا رہندے لیکن ساریں دا بلا امتیاز احتساب تھیوݨا چاہیدے، نیب آرڈیننس 1999 دے تحت فوج دے حاضرسروس افسران توں علاوہ کہیں کوں استثنا  حاصل کائنی ، کوئی مقدس ڳئوں کائنی اے قانون سارے پبلک آفس ہولڈرز اتے سارے پاکستانی شہریاں تے لاگو تھیندے ،پاک فوج اچ سخت قوانین نافذ ہن تے سخت سزاواں ݙتیاں ویندن ، انہاں آکھیے عدالت عظمیٰ دے ججز بارے آکھیا ویندے جو انہاں بارے صرف سپریم جوڈیشل کونسل نال رجوع کیتا ونڄ سڳدے اے درست ڳالھ اے لیکن فوجداری جرم دی صورت اچ نیب آرڈیننس دے تحت وی کارروائی کیتی ونڄ سڳدی اے ۔