وزیراعظم شہباز شریف نینگراں، تریمتاں تے کساناں دی ترقی دے انقلابی پروگرام بجٹ اچ رلاوݨ دی منظوری ݙے ݙتی

اسلام آباد۔8جون(اے پی پی):وزیراعظم شہبازشریف نینگراں، تریمتاں تے کساناں دی ترقی دے انقلابی پروگرام بجٹ اچ رلاوݨ دی منظوری ݙے ݙتی ۔وزیراعظم آفس دے میڈیا ونگ توں جاری بیان موجب بجٹ 24-2023 اچ نینگراں ،تریمتاں تے زرعی ٹیوب ویلز متعلق خصوصی منصوبیں کیتے رقم مختص کیتی ویسی ، نینگراں کوں بلاسود قرضے ملسن ، تعلیم اتے سپورٹس انڈئومنٹ فنڈ بݨائے ویسن ۔ پنجاب انڈئومنٹ فنڈ دی طرز تے “پاکستان انڈئومنٹ فنڈ تعلیم” قائم کرݨ دی وی منظوری ݙتی ڳئی اے ،ایں فنڈ توں ملک دے ذہین لیکن غریب طلبا و طالبات کوں وظائف ݙتے ویسن۔نوجواناں کوں چھوٹے قرضے ݙیوݨ دے وزیراعظم یوتھ پروگرام کیتے خطیر رقم مختص کیتی ڳئی اے ۔ نوجواناں کوں آئی ٹی سودھے مختلف ہنر سکھاوݨ کیتے وسائل بجٹ اچ رکھیے ڳن  ۔نوجواناں کوں ھک لکھ مفت لیپ ٹاپ دی فراہمی کیتے رقم وی بجٹ اچ مختص کیتی ڳئی اے ۔ آئی ٹی دے شعبے اچ نواں کاروبار شروع کرݨ آلے نینگراں دی مالی مدد کیتی ویسی  ۔نوجواناں کوں کھیݙ دے میدان اچ گھن آوݨ سپورٹس سرگرمیاں دی حوصلہ افزائی کیتے فنڈز مختص کرݙتے ڳئن ۔ تریمتاں مالی طور تے بااختیار بݨاوݨ دے پروگرام کیتے رقم رکھی ڳئی اے ۔ زرعی ٹیوب ویلز دی شمسی توانائی تے منتقلی پروگرام دی وی منظوری ݙتی ڳئی اے، زرعی ٹیوب ویلز دی شمسی توانائی تے منتقلی وزیراعظم دے کسان پیکج دے ݙوجھے حصے دے طورتے کیتی ویسی ۔