ٻال قوم دا مستقبل، انہاں کوں سنوارݨ کیتے تعلیم و تربیت دے نال نال جبری مشقت اتے ذہنی و جسمانی استحصال تو بچاوݨ بارے اقدامات  دی لوڑھ اے ، سپیکر  قومی اسمبلی راجہ پرویز اشرف

اسلام آباد۔12جون(اے پی پی):سپیکر قومی اسمبلی راجہ پرویز اشرف آکھیے ٻال کہیں وی قوم دا مستقبل ہوندن جنہاں کوں سنوارݨ کیتے بہترین تعلیم و تربیت دے نال نال انہاں کوں ہر قسم دی جبری مشقت اتے ذہنی و جسمانی استحصال توں بچاوݨ کیتے خصوصی اقدامات چاوݨ دی لوڑھ اے ۔ اے ڳالھ انہاں عالمی چائلڈ لیبر ڈے دے موقع تے آپݨے پیغام اچ آکھی اے جیڑھا جو ہر سال 12 جون کوں اقوام متحدہ دے زیر اہتمام پوری دنیا اچ منایا ویندے ۔ راجہ پرویز اشرف آکھیے ٻالاں توں جبری مشقت گھنݨ انہاں توں انہاں دا بچپن کھس گھنݨ دے مترادف اے ،مشقت گھنݨ توں او تعلیم حاصل کرݨ کھیݙاں اچ حصہ گھنݨ (جیڑھی جو انہاں دی نشونما کیتے ضروری ہن ) توں محروم رہ ویندن ۔ سپیکرآکھیے آئین پاکستان ٻالاں دے حقوق دے تحفظ دی مکمل ضمانت ݙیندے ، آئین دے تحت 5 توں 16 سال تئیں دے ٻالاں کوں تعلیم حاصل کرݨ کیتے سہولتاں ݙیوݨ حکومت دی ذمہ واری اے۔انہاں آکھیے پاکستان ٻالاں کوں مشقت توں بچاوݨ دے عالمی کنونشن دا سگنیٹری اے تے ایں حوالے نال عالمی معاہدات تے سختی نال عمل کریندا پئے ۔انہاں دا آکھݨ ہئی جو پاکستانی قوانین دے مطابق ٻالاں توں جبری مشقت گھنݨ ھک قابل سزا جرم اے۔سپیکر قومی اسمبلی آکھیے قومی اسمبلی دے زیر اہتمام پاکستانی پارلیمان ملک دے 75 سال مکمل تھیوݨ تے ڈائمنڈ جوبلی تقریبات دا انعقاد کیتا اتے ایں موقع تے ھک خصوصی کنونشن دا انعقاد کیتا ڳیا ہئی جیں اچ معاشرے دے سارے طبقیں توں تعلق رکھݨ آلے لوکاں کوں شرکت دا موقع ݙتا ڳیا ، ایں اہم کنونشن اچ پورے ملک توں ٻالاں کوں قومی اسمبلی دے ایوان اچ سݙیا ڳیا جتھاں انہاں آپݨی صلاحیتاں دا مظاہرہ کیتا تے ملک اچ ٻالاں کوں پیش آندے مسئلیں کوں بھر پور انداز اچ اجاگر کیتے جیں توں پورے ملک سودھے عالمی سطح تے وݙے پیمانے تے پذیرائی ملی۔