قومی اسمبلی دا بجٹ اجلاس 24 جون تئیں جاری رہسی ،ہائوس بزنس ایڈوائزری کمیٹی شیڈول دی منظوری ݙے ݙتی

اسلام آباد۔13جون(اے پی پی) قومی اسمبلی دی ہاؤس بزنس ایڈوائزری کمیٹی بجٹ اجلاس دے شیڈول دی منظوری ݙے ݙتی اے جیں موجب اجلاس 24 جون تئیں جاری رکھیا ویسی ۔ سپیکر قومی اسمبلی راجہ پرویز اشرف دی صدارت اچ ہاؤس بزنس ایڈوائزری کمیٹی دا اجلاس منعقد تھیا۔اجلاس اچ اڄوکے بجٹ اجلاس کوں بروز ہفتہ 24 جون 2023 تئیں جاری رکھݨ تے اتفاق کیتا ڳئے ۔ اجلاس  اچ بجٹ اجلاس دے ایجنڈے تے دورانیے تے ڳالھ مہاڑ کیتی ڳئی ، کمیٹی اجلاس اچ بجٹ 24 ۔ 2023 تے 17 جون تئیں عام بحث جاری رکھݨ تے اتفاق کیتے ۔ بعداچ سینیٹ آف پاکستان دی طرفوں ݙتی ڳئی سفارشات تے غور کیتا ویسی تے 19 جون 2023 کوں وزیر خزانہ بجٹ 24 ۔  2023 تے عام بحث کوں سانبھ گھنسن ۔ غیر تصویبی خرچے (چارج ایکسپنڈیچرز) تے بحث 20 جون کوں تھیسی جݙاں جو کٹوتی دی تحریکاں تے بحث 21 اتے 22 جون کوں تھیسی ۔ فنانس ٻل، 2023 تے غور اتے منظوری 23 جون کیتے تجویز کیتی ڳئی اے ، جݙاں جو 24 جون کوں 2021،2022 اتے 2023 کیتے گرانٹس دے ضمنی مطالبات زر تے بحث کیتی ویسی ۔کمیٹی اجلاس اچ فیصلہ کیتا ڳئے جو بجٹ اجلاس کوں ہفتے دے ݙٰینھ 17 جون اتے 24 کوں وی جاری رکھیا ویسی ، اجلاس اچ وفاقی وزرا رانا تنویر حسین، مرتضیٰ جاوید عباسی، شازیہ مری اتے ارکان قومی اسمبلی خالد حسین مگسی، حامد حمید، ڈاکٹر رمیش کمار وانکوانی، صابر حسین قائم خانی، مولانا عبدال اکبر چترالی، چوہدری برجیس طاہر، قومی اسمبلی دے سیکرٹری طاہر حسین اتے ایڈیشنل سیکرٹری قانون سازی محمد مشتاق شرکت کیتی۔