فنکار ساݙی شناخت اتے قومی اثاثہ ہن، ملکی ثقافت دے ودھارے تے قومی تشخص کوں پروان چڑھاوݨ اچ فنکاراں دا کلیدی کردار اے، وفاقی وزیر اطلاعات مریم اورنگزیب دی فلم، اسٹیج اتے ٹی وی آرٹسٹاں نال ڳالھ مہاڑ

لاہور ۔14جون(اے پی پی) وفاقی وزیر اطلاعات و نشریات مریم اورنگزیب آکھیے فنکار ساݙی شناخت اتے قومی اثاثہ ہن، ملکی ثقافت دے ودھارے تے قومی تشخص کوں پروان چڑھاوݨ اچ فنکاراں دا کلیدی کردار اے، اے ڳالھ انہاں ملاقات کیتے آوݨ آلے فلم، اسٹیج اتے ٹی وی آرٹسٹاں نال ڳالھ مہاڑ کریندے ہوئیں آکھی اے ۔ فنکاراں آندے مالی سال دے بجٹ اچ فلم فنانس فنڈ تے ہیلتھ انشورنس کیتے ودھ ساری رقم مختص کرݨ تے وفاقی وزیر اطلاعات نال اظہار تشکر کیتا۔ انہاں وزیراعظم شہباز شریف اتے وفاقی وزیر اطلاعات دی کاوشاں تے انہاں کوں زبردست خراج تحسین پیش کیتے۔ ایں موقع تے ڳالھ مہاڑ کریندے ہوئیں وفاقی وزیر اطلاعات آکھیے تخلیقی سوچ دی حوصلہ افزائی معاشرے دی نمو کیتے ناگزیر اے۔ انہاں آکھیے جو آندے مالی سال دے بجٹ اچ فلم فنانس فنڈ کیتے ݙو ارب اتے فنکاراں دی ہیلتھ انشورنس کیتے ھک ارب روپے مختص کیتے ڳئن ۔ وفاقی وزیر آکھیے فلمی صنعت دی ترقی اتے بحالی حکومت دی اولین ترجیح اے۔ انہاں آکھیے پوری دنیا اچ پاکستان دے مثبت تشخص اتے روشن شناخت کوں ودھاوݨ ویلھے دی اہم لوڑھ اے ، فلماں ملک دی ثقافت، تاریخ، اقدار، ورثہ اتے سیاحت کوں اجاگر کرݨ دا اہم ذریعہ ہن۔ وفاقی وزیر اطلاعات فنکاراں دے مسئلے حل کرݨ تے سابق دور اچ فنکاراں دی حق تلفیاں دے ازالے دا یقین ݙیوایا ۔ فنکاراں وفاقی وزیر اطلاعات مریم اورنگزیب کوں پھلاں دا گلدستہ وی پیش کیتا۔