چھل توں متاثرہ علاقیاں اچ گھر ٻݨاوݨ اتے بحالی کیتے 16 ارب 30 کروڑ ڈالر دی لوڑھ اے جئیں اچوں 11 ارب ڈالر سندھ اچ خرچ تھیسن، وزیر خزانہ سینیٹر اسحاق ڈار

اسلام آباد۔19جون  (اے پی پی) وفاقی وزیر خزانہ سینیٹر اسحاق ڈار آکھیا جو چھل توں متاثرہ علاقیاں اچ گھر ٻݨاوݨ اتے بحالی کیتے 16 ارب 30 کروڑ ڈالر دی لوڑھ اے جئیں اچوں 11 ارب ڈالر سندھ اچ خرچ تھیسن۔ اساں میثاق جمہوریت وانڳ میثاق معیشت دی وی کوشش کیتی تانجو ہک روڈ میپ ٻݨ ونڄے جئیں تے عمل کر تے اساں معاشی بہتری آلے پاسے ٹر سڳوں۔ سنوار کوں قومی اسمبلی اچ پیپلزپارٹی دی تریمت رکن ڈاکٹر نفیسہ شاہ ولوں چاتے ڳے نکات دا ولدا ݙیندیں ہوئیں اسحاق ڈار آکھیا جو سندھ سودھے چھل توں متاثرہ علاقیاں اچ ریلیف دے مرحلے اچ بے نظیر انکم سپورٹ پروگرام دے ذریعے 80 ارب روپے تقسیم کیتے ڳن اتے این ڈی ایم اے ولوں ریلیف دا سامان وی تقسیم کیتا ڳے۔ انہاں آکھیا جو متاثرہ علاقیاں اچ گھر ٻݨاوݨ اتے بحالی کیتے 16 ارب 30 کروڑ ڈالر دی لوڑھ اے جئیں اچوں 11 ارب ڈالر سندھ اچ خرچ تھیسن۔