وزارت اطلاعات تے نشریات ریڈیو پاکستان دے 38 ملازماں کوں ترائے مہینے اچ پنشنری مراعات ݙیوے، سیکرٹری وزارت اطلاعات 3 مہینے اچ ادائیگی کیتے مجاز اتھارٹی توں منظوری ڳھنن اتے وفاقی محتسب کوں تعمیل دی رپورٹ جمع کراون، صدر مملکت ڈاکٹر عارف علوی دی ہدایت

اسلام آباد۔19جون  (اے پی پی) صدر مملکت ڈاکٹر عارف علوی ریڈیو پاکستان دے ملازمین کوں ریٹائرمنٹ مراعات ݙیوݨ دی ہدایت کریندیں ہوئیں آکھیا جو ادائیگی نہ تھیوݨ پاروں ریٹائرڈ ملازماں دے ٹٻر اوکھ اچ ہن۔ ریڈیو پاکستان سویں ریونیو پیدا کرݨ آلے ادارے کوں مالی وسائل دی ڳھٹکی باعث تشویش اے۔ سنوار کوں ایوان صدر دے پریس ونگ توں جاری بیان موجب صدرمملکت آکھیا جو وزارت اطلاعات تے نشریات ریڈیو پاکستان دے 38 ملازماں کوں ترائے مہینے اچ پنشنری مراعات ݙیوے،  سیکرٹری وزارت اطلاعات 3 مہینے اچ ادائیگی کیتے مجاز اتھارٹی توں منظوری ڳھنن اتے وفاقی محتسب کوں تعمیل دی رپورٹ جمع کراون۔ تفصیل موجب سید پرویز حسین شاہ اتے ٻے 37 لوکاں وفاقی محتسب کوں شکایت کیتی ہئی۔ انہاں موجب مختلف تاریخاں تے سروس توں ریٹائر تھیوݨ آلے انہاں سابق ملازماں دے پنشن پیمنٹ آرڈر جاری تھیے پر ادائیگی نی کیتی ڳی۔