سیلاب متاثرہ علاقیاں اچ تعمیرنو و بحالی دا ماسٹرپلان 15 جولائی تئیں ٻݨسی، وزیر خزانہ سینیٹر اسحاق ڈار

اسلام آباد۔22جون(اے پی پی)وفاقی وزیر خزانہ سینیٹر اسحاق ڈار آکھیے جو سیلاب متاثرہ علاقیاں اچ تعمیرنو و بحالی دا ماسٹرپلان 15 جولائی تئیں ٻݨسی، مشاورت نال طے تھئے جو 16 ارب ڈالر دے منصوبیاں اچوں ادھا وفاقی حکومت ٻیا ادھے صوبے فنانس کریسن، نویں مالی سال دے وفاقی بجٹ اچ سیلاب متاثرہ علاقیاں کیتے منصوبیاں کیتے فنڈز مختص کرݙتن۔ قومی اسمبلی اچ الیندے وزیر خزانہ سینیٹر اسحق ڈار آکھیے جو سیلاب متاثرہ علاقیاں دے منصوبیاں بارے ڳالھ تھئی اے۔ وزیر خزانہ آکھیا جو سیلاب دے بعد امداد و بحالی کیتے 100 ارب روپے دی لوڑھ ہئی جیندے اچوں 80 ارب روپے جاری کیتن، این ڈی ایم اے اتے ای سی سی تعاون کیتے ڄݙاں جو عالمی بینک، ایشیائی ترقیاتی بینک، یورپی یونین، یو این ڈی پی اتے وزارت منصوبہ بندی دی باڈی ٻݨائی ہئی جیں جامع رپورت ݙتی اے، رپورٹ اچ سیلاب نال اقتصادی و طبعی نقصانات دا اندازہ 30 ارب روپے لڳے، سیلاب نال بحالی و تعمیر نو دے فوری 4 توں 5 سال تئیں دے منصوبیاں کیتے 16.3 ارب ڈالر اچوں 11 ارب ڈالر دے منصوبے سندھ اچ ہین ڄݙاں جو باقی بلوچستان اتے جنوبی پنجاب دے ہین۔ انہاں منصوبیاں دا ماسٹر پلان 15 جولائی تئیں ٻݨ ویسی۔