حج کا رکن اعظم وقوف عرفہ صبحائیں(منگل) ادا کیتا ویسی

مکہ مکرمہ ۔26جون(اے پی پی)حج دا رکن اعظم وقوف عرفہ صبحائیں ( منگل) کوں میدان عرفات اچ ادا کیتا ویسی جتھاں پورے ڄڳ توں کوئی 160 ملکاں دے 30 لکھ توں ودھ عازمین حج کیتے آئے ہوئے ہین۔ سعودی حکومت منیٰ، مزدلفہ اتے میدان عرفات اچ مناسک حج دی ادائیگی کیتے عازمین حج کوں سوکھ فیوݨ دے بہترین انتظامات کیتن۔ ڄاۃ ڄاہ تے حجاج دی رہنمائی کیتے سعودی حکومت ولوں فوج، پولیس اتے رضاکار موجود ہین ڄݙاں جو 40 ہزار کمانڈر، ہک لکھ 25 ہزار اہلکار، 40 ہزار ٹریفک پولیس اہلکار، سعودی وزارت حج دے 95 ہزار ملازمین، شہری دفاع دے 17 ہزار اہلکار، حرمین کمیٹی دے 10 ہزاراہلکاراں سودھا 25 ہزار سعودی یونیورسٹیاں دے طلبا وی خدام حجاج اچ شامل ہین۔ ڈرون طیاراں سودھا ہیلی کاپٹرز توں وی مناسک حج دی خصوصی نگرانی کیتی ویسی۔ عازمین منگل کوں فجر دی نماز توں بعد حج پڑھݨ کیتے مکہ مکرمہ توں میدان عرفات پڄسن جتھاں مسجد نمرہ اچ خطبہ حج ݙتا ویسی اتے حاجی پیشیں اتے دیگر دی نماز کٹھے پڑھسن۔ دیگر اتے مغرب وچال وقوف ہوسی جیندے اچ حجاج اللہ رب العزت دے حضور دعائیں منڳسن۔ نماز مغرب توں پہلے میدان عرفات چھوڑݨ دا حکم اے۔ حاجی میدان عرفات توں مزدلفہ ویسن اتے اتھاں مغرب تے عشاء دیاں نمازاں کٹھیاں پڑھسن اتے شیطان کوں مارݨ کیتے وٹے چݨسن۔ رات مزدلفہ اچ کھلے آسمان ہیٹھ رہݨ توں بعد نماز پڑھ تے حاجی ولا منیٰ اچ اپݨے خیمیاں اچ ا ویسن اتے شیطان کوں پہلے ݙینھ وٹے مارݨ کیتے جمرات کمپلیکس ویسن۔ وٹے مارݨ دے بعد حاجی ولا منیٰ ولسن اتے قربانی توں بعد وال کٹوا تے احرام کھول ݙیسن۔ ݙوڄھے اتے تریڄھے ݙینھ وی حاجی شیطان کوں وٹے مریسن اتے اتھو مکہ مکرمہ ول آسن۔ منیٰ اچ 3 ݙینھ رہݨ اتے کہیں ویلھے طواف زیارت کیتے مکہ ونڄݨ وی حج دا لازمی رکن اے۔