گریژنز،  فوجی  تنصیبات، جی ایچ کیو اتے جناح ہائوس دی سکیورٹی اچ ناکامی تے لیفٹیننٹ جنرل سودھا 3 فوجی افسران نوکری توں فارغ، 3 میجر جنرلز، 7 بریگیڈئرز اتے 15 افسران دے خلاف سخت کارروائی، ترجمان پاک فوج

راولپنڈی ۔26جون(اے پی پی)پاک فوج دے ترجمان میجر جنرل احمد شریف چوہدری آکھیے جو مفصل احتسابی عمل دے بعد انکوائری پاروں گریژنز،  فوجی  تنصیبات، جی ایچ کیو اتے جناح ہائوس دی سکیورٹی اچ ناکامی تے لیفٹیننٹ جنرل سودھا 3 فوجی افسران نوکری توں فارغ کر ݙتن، 3 میجر جنرلز، 7 بریگیڈئرز اتے 15 افسران دے خلاف سخت کارروائی کیتی ڳئی اے، سابق فور سٹار جنرلز دی ݙوتری، ڄوانترا، گھر آلی، سابق ٹو سٹار جنرل دی بیگم تے ڄوانترا پاک فوج دے احتسابی عمل دی وٹھ اچ ہین، آرمی ایکٹ دے تحت سانحہ 9 مئی دے 102 ذمہ داران دے خلاف ٹرائل جاری اے، 9مئی واقعہ ہک مقصد، منصوبہ بندی اتے سوچ دے تحت کیتا ڳئے جیندا الزام پاک فوج تے لاوݨ شرمناک اے۔ اے ڳالھ انہاں آئی ایس پی آر ڈائریکٹوریٹ اچ پریس کانفرنس کریندے آکھی۔ ڈی جی آئی ایس پی آر میجر جنرل احمد شریف چوہدری آکھیا جو 9 مئی دے واقعات ثابت کیتے جو کم دشمن نئیں کر سڳیا او کڄھ شرپسنداں کر ݙکھائے اتے اے ہک وݙی سازش ہئی، ہݨ تئیں دی تحقیقات اچ وݙے ثبوت ملین، 9مئی کوں شہدا پاکستان دے خانداناں دا دل ݙکھایا ڳئے، اڄ سوال اٹھدے پن جو اینڄھے شرپسنداں دے خلاف کای کارروائی تھیسی؟ جیکر ایویں تھیندا ریہا تاں اتنیاں وݙیاں جاناں دی قربانی ݙیوݨ دی کیا لوڑھ اے؟ انہاں آکھیا جو دہشتگردی دے خلاف آپریشن یکسوئی نال جاری اے، افواج پاکستان دے خلاف زہریلا  پروپیگنڈا تھیندا پئے، افواج کوں کہیں صورت اپݨے عوام توں نئیں نکھیڑیا ونڄ سڳدا، سیاسی مقاصد کیتے پاک فوج دے خلاف کوڑ کھنݙائے ڳن، افواج پاکستان ملک دے دفاع  اتے عوام دی فلاح و بہبود کیتے قربانیاں ݙینداں راہسن، حالات کینڄھے وی ہوون فوج قربانیاں ݙیوݨ توں پچھو نا ہٹسی، سانحہ 9 مئی بھلایا ویسی نا ملوث عناصر کوں معاف کیتا ویسی، سارے ملوث کرداراں کوں آئین پاکستان اتے قانون دے تحت سزا ݙتی ویسی، فوج اپݨی روایات دے مطابق خود احتسابی مرحلہ مکمل کر ڳھدے اتے اے فیصلہ کیتے جو سکیورٹی اچ ناکامی دے ذمہ داراں دے خلاف کارروائی کیتی ونڄے، فوجی تنصیبات اتے جی ایچ کیو دے سکیورٹی دے ذمہ داران دے خلاف کاروائیاں کیتاں ڳن، ہک لیفٹیننٹ جنرل سودھا 3 ٻئے عہدے توں فارگ کیتن، 3 میجرجنرل ،7بریگیڈیئرز سودھا 15 افسران دے خلاف تادیبی کارروائی کیتی گئی اے اتے ہک لیفٹیننٹ جنرل سودھا 3 افسران کوں نوکری توں فارغ کیتے۔ ، سابق فور سٹار جنرلز دی ݙوتری، ڄوانترا، گھر آلی، سابق ٹو سٹار جنرل دی بیگم تے ڄوانترا پاک فوج دے احتسابی عمل دی وٹھ اچ ہین۔ جی آئی ایس پی آر آکھیا جو فوجی عدالتاں اچ 102 شرپسنداں دا ٹرائل تھیندا پئے اتے تھیندا رہسی، فوج اچ خود احتسابی دا عمل بغیر کہیں وانڄھ دے کیتا ویندے، ملٹری کورٹس بارے سپریم کورٹ اچ کیس چلدا پئے، پورے ملک اچ 17 اسٹینڈنگ کورٹس کم کرینداں پن، ملٹری کورٹس پہلے توں ہی فعال ہین، سویلئن دے خلاف کیسز پورے شواہد نال چلائی ویندے پن، ثبوت اتے قانون دے مطابق ہی سزا ݙتی ویسی۔