آئی ایم ایف نال معاہدہ ملکی معیشت کوں تکڑا کریسی، وزیراعظم محمد شہباز شریف دی پریس کانفرنس

لاہور۔30جون(اے پی پی)وزیراعظم محمد شہباز شریف آکھیے جو پاکستان اتے آئی ایم ایف وچال سٹاف لیول معاہدہ تھیوݨ دے بعد 12 مئی کوں ایگزیکٹو بورڈ توں منظوری ڳھدی ویسی، ودھ سفارتکاری اتے سخت محنت دے بعد 3 ارب ڈالر دا معاہدہ تھئے ڄیڑھا ملکی معیشت کوں تکڑا کرݨ اچ ہتھ ونݙیسی، پچھلے 3 مہینے اچ چین پاکستان کوں ݙیوالا تھیوݨ توں بچائے، سعودی عرب تے متحدہ عرب امارات وی وݙا ہتھ ونݙائے، اساں ملکی معیشت دی بحالی دا جامع منصوبہ ٻݨائے، مدت مکمل تھیوݨ تے حکومت چھوڑ ݙیسوں، انتخابات دی تاریخ ݙیوݨ تے الیکشن کراوݨ الیکشن کمیشن دا کم اے، اڄوکی حکومت دے دور اچ ہک روپے دی کرپشن دا کیس سامݨے نئیں آیا۔ لاہور اچ پریس کانفرنس کریندے وزیر اعظم آئی ایم ایف نال سٹاف لیول دا معاہدہ تھیوݨ تے قوم کوں مبارک ݙتی۔ ایں موقع تے وفاقی وزیر خزانہ سینیٹر اسحاق ڈار، وفاقی وزیر اطلاعات و نشریات مریم اورنگزیب اتے گورنر پنجاب انجینئر بلیغ الرحمن وی موجود ہن۔ انہاں آکھیا جو آئی ایم ایف نال کئی مہینے توں ڳالھ چلدی پئی ہئی، ایں معاشی ٻھار اتے عوام دے ٻہوں ݙکھ چاوݨ دیاں وجوہات دا ڄاݨݨ ضروری اے، 2018 تئیں ملک تیزی نال ترقی کریندا پیا ہا ہر شعبہ نمو ݙیکھندا پیا ہا ٻھل ول بدترین دھاندلی نال عمران نیازی کوں سافے تے مسلط کیتا ڳئے تاں ملک ݙیوالا تھیوݨ کوں آڳئے، پچھلی حکومت آئی ایم ایف نال معاملات وڳاڑین، معاہدے اچ چرک نال ملک و قوم دا وݙا نقصان تھئے، معاہدے تروڑیے ڳن، عالمی سطح تے پاکستان دی ساکھ دا تے لائی ڳئی اے، اساں وݙی محنت نال آذربائیجان نال ایل این جی معاہدہ کیتے، روس توں سستا تیل آوݨ لڳ ڳئے، اتحادی حکومت ملک کوں ترقی دی راہ تے سٹݨ کیتے پورا زور لیندی پئی اے، ساݙے کڄھ دوست نما دشمن پاکستان کوں وی سری لنکا ٻݨاوݨ چاہندے ہن ٻھل انہاں کوں ناکامی تھئی اے۔ وزیراعظم آکھیا جو منیجنگ ڈائریکٹر آئی ایم ایف پاکستان نال پورا تعاون کیتے، اساں ملک کوں پیریں تے کھڑا کرݨ کیتے اپݨی سیاست دا تے لا چھوڑی اے ول ملک ݙیوالا تھیوݨ توں آن بچے، شکر اے جو اساں سرخرو تھئے ہیں اتے سٹاف لیول معاہدہ تھی چکیے، 12 جولائی کوں آئی ایم ایف نال ایگزیکٹو بورڈ دا اجلاس تھیسی جیندے اچ پاکستان کیتے 3 ارب ڈالر دے سٹینڈ بائی معاہدہ دی منظوری ملسی، ، سافی معاشی ٹیم مبارک ڳھنے ڄئیں ݙینھ رات محنت کیتی اے، اے قرضہ ساکوں مجبوراً ڳھنݨا پئے، پاکستانی دعا کرن جو اے چھیکڑی قرض ہووے تے ول آئی ایم ایف کولو نا ونڄݨا پووے۔