سعودی عرب توں 2 ارب ڈالر دے ڈیپازٹس سٹیٹ بینک کوں مل ڳن، آوݨ آلے ݙینھ اچ ٻی چنڳی خبراں ملسن، وزیرخزانہ اسحاق ڈاردی میڈیا نال ڳالھ مہاڑ

اسلام آباد۔11جولائی  (اے پی پی) وفاقی وزیرخزانہ تے محصولات سینیٹرمحمداسحاق ڈار آکھیا جو سعودی عرب توں 2 ارب ڈالر دے ڈیپازٹس سٹیٹ بینک کوں مل ڳن، آوݨ آلے ݙینھ اچ ٻی چنڳی خبراں ملسن۔ سعودی عرب ہمیشہ اوکھے ویلھے حقیقی بھرا دا کردار ادا کریندیں ہوئیں پاکستان نال تعاون کیتے۔ منگل کوں میڈیا نال ڳالھ مہاڑ کریندیں ہوئیں وزیرخزانہ آکھیا جو کجھ ہفتے پہلے سعودی عرب پاکستان کوں ݙو ارب ڈالر دے تعاون ݙیوݨ دا اعلان کیتا ہئی۔  الحمدللہ سعودی عرب ولوں اے تعاون پاکستان کوں مل ڳے۔ وزیرخزانہ آکھیا جو سٹیٹ بینک ولوں ہر جمعے کوں زرمبادلہ بارے اعدادوشمار ݙتے ویندن، گزریل فہتے سٹیٹ بینک زرمبادلہ دے جیڑھے اعدادوشمار جاری کیتے ہن انہاں موجب پاکستان دے زرمبادلہ دے ذخائر9.67 ارب ڈالرہن، سعودی عرب ولوں ݙو ارب ڈالر ملݨ دے بعد پاکستان دے زرمبادلہ دے ذخائر11.67 ارب ڈالر دے نیڑے تھی وسین۔ انہاں آکھیا جو او وزیراعظم محمدشہباز شریف، آرمی چیف سید عاصم منیر، پاکستانی عوام اتے اپݨے ولوں سعودی  فرمانروا اتےخادم الحرمین الشریفین شاہ سلمان بن عبدالعزیز، ولی عہد شہزادہ محمد بن سلمان اتےسعودی عرب دی قیادت دا شکریہ ادا کریندن۔