سابق حکومت ریڈیو اتے پی ٹی وی دے اثاثیاں کوں نیلام کرݨ دا منصوبہ ٻݨایا، اساں قومی اثاثیاں کوں عوام کیتے استعمال کیتے، نیلام نی کیتا، سابق وزیراطلاعات ہر چیز کون ویچ ݙیو دی پالیسی تے آئے ہن، مریم اورنگزیب

اسلام آباد۔13جولائی  (اے پی پی) وفاقی وزیر اطلاعات تے نشریات مریم اورنگزیب آکھیا جو سابق حکومت ریڈیو اتے پی ٹی وی دے اثاثیاں کوں نیلام کرݨ دا منصوبہ ٻݨایا، اساں قومی اثاثیاں کوں عوام کیتے استعمال کیتے، نیلام نی کیتا، سابق وزیراطلاعات ہر چیز کون ویچ ݙیو دی پالیسی تے آئے ہن۔ اساں پی ٹی وی اتے ریڈیو پاکستان اچ معاشی بحالی دا منصوبہ شروع کیتے۔ پی ٹی وی ایں سال ریکارڈ 5.5 ارب روپے دا ریکارڈ منافع کمائے۔ پی ٹی وی پشاور، ملتان اتے کراچی توں علاقائی زباناں دی نشریات 24 گھنٹے شروع کر ݙتن۔  ریڈیو پاکستان اچ 12 نویں سٹوڈیوز ٻݨائن۔ اے ڳالھیں انہاں خمیس کوں قومی اسمبلی دی قائمہ کمیٹی برائے اطلاعات و نشریات دے اجلاس اچ ڳالھ مہاڑ کریندیں ہوئیں آکھی۔ اجلاس دی صدارت کمیٹی دی چیئرپرسن جویریہ ظفر آہیر کیتی۔ اجلاس اچ کمیٹی دے ارکان دے علاوہ وفاقی سیکریٹری اطلاعات سہیل علی خان، پرنسپل انفارمیشن آفیسر مبشر حسن، ڈی جی پیمرا سمیت وزارت اطلاعات دے افسر شریک تھیے۔ انہاں آکھیا جوپی ٹی وی ورچوئل دا اسلام آباد سینٹر اچ سٹوڈیو ٻݨایا ڳے اتے ملتان اچ سرائیکی زبان اچ نشریات کوں چووی گھنٹے شروع کر ݙتا ڳے۔ پی ٹی وی پشاور سینٹر توں پشتو زبان دی نشریات چوری گھنٹے شروع کر ݙتی ڳن۔ اینویں سندھی زبان اچ نشریات پی ٹی وی کراچی توں چووی گھنٹے چلائی ویندی پن۔