پبلک اکاؤنٹس کمیٹی دا اجلاس،پٹرولیم ڈویژن دے 20۔ 2019 دے آڈٹ اعتراضاں دا جائزہ ڳھدا

اسلام آباد۔14جولائی(اے پی پی)پبلک اکاؤنٹس کمیٹی دا اجلاس پارلیمنٹ ہاؤس اچ پی اے سی دے چیئرمین نور عالم خان دی صدارت اچ تھیا اجلاس اچ کمیٹی دے ارکان سودھے متعلقہ سرکاری اداریں دے اعلی افسران شرکت کیتی اجلاس اچ پٹرولیم ڈویژن دے 20 ۔  2019 دے آڈٹ اعتراضاں دا جائزہ ڳھدا ڳئے ۔ سپیشل سیکرٹری پٹرولیم ݙسایا جو سیکرٹری اپݨے پتر دی علالت پاروں چھٹی تے ہن ۔ پی اے سی آڈٹ حکام دی سفارش تے پٹرولیم ڈویژن دے 54آڈٹ اعتراض نبیڑ ݙتے ۔ پی اے سی دے چیئرمین نور عالم خان چیئرمین اوگرا اتے ایم ڈی پی ایس او کوں الویندے ہوئیں آکھیے جو بلوچستان اتے کے پی سودھے ملک دا کوئی وی حصہ ہووے اتھاں پی ایس او دا پٹرول پمپ کھولݨ تے پابندی چاوݨ دی پی اے سی ہدایت کرݙتی اے ۔ برجیس طاہر آکھیے محکمہ گیس ارباں روپے لاتے وستیاں اچ گیس لائناں وچھا رکھئن گیس نہ ݙیوݨ دی وجہ توں ارباں روپے دی سرمایہ کاری ضائع تھیندی پئی اے۔ ایں معاملے دا وی آڈٹ کرایا ونڄے۔ چیئرمین پی اے سی آکھیے اساں وزیر اعظم توں گذارش کریندوں ایں معاملے دا نوٹس ڳھدا ونڄے ۔