پاکستان خودمختارانہ معیشت آلے پاسے ھک ٻیا سنگ میل پار کرڳھدا

اسلام آباد۔14جولائی  (اے پی پی):پاکستان خودمختارانہ معیشت آلے پاسے ھک ٻیا سنگ میل پار کرڳھدے ، وفاقی وزیر مواصلات مولانا اسعد محمود دی قیادت اچ طے پاوݨ آلا پاکستان روس تجارتی معاہدہ کامیاب تھی ڳئے،معاہدے دے تحت تاریخ اچ پاکستان دی پہلی پیشرفت تھئی تے روس توں براستہ تاجکستان، ازبکستان، افغانستان تجارتی سامان پاکستان پڄ ڳئے ۔ وزارت مواصلات دی طرفوں جاری بیان موجب وفاقی وزیر مواصلات مولانا اسعد محمود دی طرفوں روس- پاکستان روڈ ٹو روڈ ٹرانسپورٹ دا معاہدہ 16 نومبر 2022 کوں طے تھیا ہئی ۔ وفاقی وزیر مولانا اسعد محمود مارچ اچ روس دورے ویلھے انٹرنیشنل روڈ ٹرانسپورٹ دا معاہدہ کیتا۔ وفاقی وزیر مواصلات مولانا اسعد محمود آکھیے جو روس قدرتی وسائل اتے جدید ٹیکنالوجی توں مالا مال ملک اے، ایں معاہدے دے تحت پہلی شپ منٹ دے تحت چݨے تے دھاڳے دے ٹرک پاکستان پڄ ڳئن ، وزیر مواصلات آکھیے ایں معاہدے نال پاکستان اتے روس دے تعلقات مزید بہتر اتے تکڑے تھیسن ۔ مولانا اسعد محمود آکھیے ویلھے دے نال نال روس توں پاکستان مزید سامان وی منگویسی ۔ انہاں آکھیے روس توں اساں پیٹرولیم مصنوعات وی منگوا سڳدوں، پاکستان توں کپڑا، کھیݙ دا سامان اتے چاول اساں روس کوں ݙیسوں ۔ وزیر مواصلات مولانا اسعد محمود آکھیے انٹرنیشنل ٹرانسپورٹ ایگریمنٹ ایں حوالے نال ݙوہیں ملکاں وچال کلیدی کردار نبھیسی۔ انہاں آکھیے ݙوہیں پاسوں بارڈر کراسنگ پوائنٹس تے کسٹم دے حوالے نال سوکھی پاسداری کوں یقینی بݨاوݨا ہوسی ۔