چشمہ۔5 منصوبے نال ملک کوں صاف، مؤثر اتے سستی توانائی دے ودھارے اچ مدد ملسی، وزیراعظم شہباز شریف دا تقریب توں خطاب

میانوالی۔14جولائی  (اے پی پی) وزیراعظم محمد شہباز شریف  3 ارب 48 کروڑ ڈالر مالیت دے 1200 میگاواٹ دے چشمہ۔5 منصوبے دا منڈھ بدھ ݙتے جیڑھا ست توں اٹھ سالیں اچ پورا تھیسی،  30 جون 2023 کوں وزیراعظم دی موجودگی اچ چائنا نیشنل نیوکلیئر کوآپریشن اوورسیز لمیٹڈ (سی این او ایس) اتے پاکستان اٹامک انرجی کمیشن (پی اے ای سی) وچال مفاہمت دی یادداشت تے دستخط تھیے ہن۔ جمعے کوں منڈھ بدھݨ دی تقریب توں خطاب کریندیں ہوئیں وزیراعظم آکھیا جو صاف ستھرے اتے سستی توانائی دے ذرائع نال ملک دی لوڑھ کوں ݙیکھدیں ہوئیں منصوبے کوں ویلھے تے پورا کیتا ونڄے۔ اے منصوبہ ݙو وݙے دوست ملک چین اتے پاکستان وچال تعاون دی علامت اے۔ انہاں آکھیا جو چشمہ۔5 دے معاہدہ کوں توڑ پجاوݨ دا سہرا مخلوط حکومت اتے ایس ڈی پی دے سر اے۔ وزیراعظم آکھیا جو اساݙے مخالف ہر پاسے اے افواہیں کھنڈیندے پے ہن جو پاکستان دیوالیہ تھیندا پے پر اساں صرف 15 مہینے اچ سارے رکاوٹاں کوں پار کیتے۔ حکومتی ٹیم دی کوششاں نال ملک دے دیوالیہ تھیوݨ دا خطرہ ٹل ڳے۔ وزیراعظم آکھیا جو عالمی مالیاتی فنڈ (آئی ایم ایف) دے پروگرام دی کجھ ݙینھ پہلے منظوری ݙتی ڳی ہئی اتے 48 گھنٹیاں اچ پاکستان دے برادر ملک سعودی عرب اتے  متحدہ عرب امارات ولوں تقریبا ً ساݙھے چار ارب ڈالر دے علاوہ آئی ایم ایف نال ہک ارب 20 کروڑ ڈالر منتقل تھئی اے۔ چار مہینے پہلے چینی حکومت اتے کمرشل بینکاں پاکستان کوں پنج ارب ڈالر دی رقم واپسی ٻھجوائی اے۔ وزیراعظم چینی صدر شی جن پنگ، سعودی ولی عہد شہزادہ محمد بن سلمان اتے متحدہ عرب امارات دے صدر محمد بن زید النہیان کوں اوکھے ویلھے مدد کرݨ تے شکریہ ادا کیتا۔ ایں موقع تے ڈی جی آئی انٹرنیشنل اٹامک انرجی ایجنسی (آئی اے ای اے) رافیل ماریانو گروسی ولوں مختصر سنیھا وی سݨایا ڳیا جئیں اچ انہاں وزیراعظم کوں چشمہ ۔5 دے منڈھ بدھݨ تے مبارخ ݙتی۔ چینی وفد دی اڳواݨ   پنگ چنگ شوئے وی خطاب کیتا۔ چیئرمین چائنا نیوکلیئر کمیشن وزیر اعظم کوں سووینیئر پیش کیتا۔ ایں موقع تے وزیر منصوبہ بندی تے ترقی احسن اقبال، وزیر توانائی انجینئر خرم دستگیر خان اتے چیئرمین پاکستان اٹامک انرجی ایجنسی  ڈاکٹر راجہ علی رضا وی موجود ہن۔ ایں موقع تے پاکستان اٹامک انرجی کمیشن دے منصوبیاں بارے دستاویزی فلم وی ݙکھائی ڳی۔