صدر ڈاکٹر عارف علوی نال بینکنگ محتسب محمد کامران شہزاد دی الوداعی ملاقات، کارکردگی بارے ݙسیا

اسلام آباد۔17جولائی  (اے پی پی) صدر مملکت ڈاکٹر عارف علوی نال بینکنگ محتسب محمد کامران شہزاد الوداعی ملاقات کیتی جئیں اچ انہاں صدرمملکت کوں اپݨے دور اچ ریکارڈ بینکنگ کیسز نبیڑݨ، بینک صارفین کوں مالی انصاف ݙیوݨ بارے کیتے ڳے اقدامات دا ݙسیا۔ ایوان صدر دے پریس ونگ موجب ملاقات اچ بینکنگ محتسب ݙسیا جو بطور بینکنگ محتسب، سال اپریل 2019 توں جولائی 2023 تئیں دے 4 سالہ دور اچ 3 ارب روپے دا ریلیف ݙتے، میݙے دور توں پہلے سال 2005 توں 2018 تئیں دے 13 سالیں اچ عوام کوں 2.3 ارب روپے دا ریلیف ݙتا ڳے، اپݨے دور اچ 106,486 کیسز نبیڑ تے بینکنگ صارفین کوں ارباں روپے دا مالی انصاف ݙتے۔ صدرمملکت بینکنگ محتسب ولوں ڳھٹ مدت اچ عوام کوں ترائے ارب روپے توں ودھ دا ریلیف ݙیوݨ تے انہاں دی تعریف کیتی۔