اعظم خان سائفر سازش کوں بے نقاب کرݙتے ، سیکرٹ دستاویز کوں عام کرݨ ، ذاتی تحویل اچ رکھݨ تے ریاست دی مدعیت اچ فتنہ خان اتے شریک جرم شاہ محمود دے خلاف آفیشل سیکرٹ ایکٹ دے تحت مقدمہ درج کیتا ویسی ،وزیرداخلہ رانا ثنا اللہ خان دی پریس کانفرنس

اسلام آباد۔19جولائی(اے پی پی):وفاقی وزیر داخلہ رانا ثنا اللہ خان آکھیے اعظم خان سائفر سازش کوں بے نقاب کرݙتے ، سیکرٹ دستاویز کوں عام کرݨ ، ذاتی تحویل اچ رکھݨ تے ریاست دی مدعیت اچ فتنہ خان اتے شریک جرم شاہ محمود دے خلاف آفیشل سیکرٹ ایکٹ دے تحت مقدمہ درج کیتا ویسی۔ ساریں توں پہلے سیکرٹ دستاویز اوں بندے دے قبضے توں برآمد کیتی ویسی ، ملک کوں کہیں حادثے توں ݙوچار کرݨ آلا جتھہ خود حادثے دا شکار تھی ڳئے۔ 9مئی دےواقعات اچ ملوث شر پسنداں دے خلاف آرمی ایکٹ دے تحت کارروائی جاری اے ، اعظم خان دفعہ 164 اتے دفعہ 161 دے تحت اپݨا تفصیلی بیان مجسٹریٹ دے سامݨے ریکارڈ کرائے ۔سائفر معاملے اچ متعلقہ سفیر، سیکرٹری خارجہ دے رلݨ دے شواہد نی ملیے ۔ او پی ٹی وی ہیڈکوارٹر اچ پریس کانفرنس توں خطاب کریندے پئے ہن ۔ وفاقی وزیر داخلہ رانا ثنا اللہ خان آکھیے فتنہ خان دے پرنسپل سیکرٹری اعظم خان دا اقبالی بیان سامݨے آئے۔ اے بیان فتنہ خان دے خلاف فرد جرم اے ، ایں بیان توں پتہ لڳدے جو ایندے اچ اصل میر جعفر کون ہئی ۔ایں بندے ذاتی مفادات دی خاطر ملک دے مفادات کوں داؤ تے لاݙتا تے ملک دے اداریں دے خلاف سازش کیتی ۔ ایں بندے ملکی مفادات کوں مجروح کریندے ہوئیں ملکی معیشت کوں بردباد کیتا تاں ݙوجھے پاسے خارجہ تعلقات کوں ضیان پجائے ۔ آپݨے سیاسی مفادات کیتے کھیݙ کھیݙیا تے سائفر دی بنیاد تے ڈرامہ رچایا ،ایجھا جرم کیتے جیں دی سزا ہر قیمت تے بݨدی اے ۔ انہاں آکھیے اعظم خان دا بیان سامݨے آوݨ دے بعد کجھ عرصہ پہلے لیک تھیوݨ آلی آڈیو اچ پیش تھیوݨ آلے موقف دی تائید کیتی اے ایں بیان دے بعد ثابت تھی چکیے جو ایں معاملے اچ فتنہ خان نال شاہ محمود قریشی وی برابر دے شریک ہن ۔ ھک سازش دے تحت پاکستان  تے ملکی اداریں دے خلاف نفرت کھنڈاوݨ دی کوشش کیتی ڳئی ۔ انہاں آکھیے سیکرٹ دستاویزات عام  کرݨ تے امریکی صدر کوݨ وی سزا ملی اے ،فتنہ خان اتے شریک مجرم کوں وی سزا ملسی ۔ وزیر داخلہ رانا ثنا اللہ خان آکھیے 9مئی وی ایں سائفر دا تسلسل اے ۔ دفاعی اداریں تے حملے ، ملک دی عزت ، ماݨ تے شہدا دی یادگاراں دی بے حرمتی کرتے پاکستان اتے دفاعی اداریں کوں ناقابل تلافی ضیان پڄایا ڳیا ، ایں جتھے تے ٹولے دی ھک ہی سازش ہئی جو کیویں اداریں تے ملک کوں ضیان پڄایا ونڄے تے ایندے تانے بانے پاکستان دے اندر دے نال نال ٻاہرلے ملک نال وی رلدن