نگراں حکومت اپݨیاں آئینی ذمہ داری ںبھیسی، شفاف و منصفانہ انتخابات کیتے پورا ہتھ ونݙیسوں، نگراں وزیراعظم دی قائداعظم دے مزار دے ٻاھرو میڈیا نال ڳالھ مہاڑ

کراچی۔22اگست(اے پی پی):نگراں وزیراعظم انوار الحق کاکڑ آکھیے جو قائداعظم محمد علی جناح ہمیشہ اقلیتاں دے حقوق تے زور ݙتے، نگراں حکومت اپݨیاں آئینی ذمہ داری ںبھیسی، شفاف و منصفانہ انتخابات کیتے پورا ہتھ ونݙیسوں۔ او کراچی اچ قائداعظم محمد علی جناح دے مزار تے حاضری دے بعد میڈیا نال الیندے پئے ہن۔ انہاں آکھیا ڄیرھے مقصد کیتے قائداعظم اے ریاست ٻݨائی ہئی ایندے نال تجدید وفا کیتا ونڄے، آئینی لوڑھ دے مطابق اے حکومت محدود مدت کیتے ٻݨی اے، انتخابات کیتے پورا زور لیسوں اتے کوشش ہوسی جو انتخابات شفاف اتے غیر جانبدارانہ ہوون جو کوئی وی ایندے تے اعتراض نا کر سڳے اتے پاکستان اچ آئینی و قانونی طریقہ نال ہک منتخٻ حکومت کوں اقتدار منتقل تھیوے۔ وزیراعظم آکھیا جو قائداعظم محمد علی جناح 11 اگست 1947ء کوں آئین ساز اسمبلی نال تاریخ ساز خطاب کیتا ہا جیندے اچ زبان، مذہب اتے فرقہ دی کوئی ونݙ کائنا ہئی، نویں ریاست دا بنیادی نعرہ ہکو ہا جو پاکستان اچ سماجی و معاشی حقوق شہری اتے ریاست وچال ہوسن، ساکوں ݙتی ڳئی آئینی ذمہ داری قائد دے خواب اتے عزم دے مطابق اے، اساں ملک و قوم دی خدمت کیتے پرعزم ہیں، اساں ہک ایمندار طریقے نال اڳو تے ودھدے نظرسوں، ایہو پاکستان دا مستقبل، ایہو عمل اتے فکر ملک کیتے مثال اے۔