دہشت گردی اتے انتہا پسندی دا پورا خاتمہ کیتا ویسی، پوری قوم ایں معاملے تے متحد اے، نگران وفاقی وزیر داخلہ

اسلام آباد۔23اگست (اے پی پی) نگران وفاقی وزیر داخلہ سرفراز بگٹی بدھ کوں نیکٹا ہیڈ کوارٹر دا دورہ کیتا۔ نیشنل کوآرڈینیٹر نیکٹا آئی جی محمد طاہر رائے وزیر داخلہ کوں بریفنگ ݙتی۔دورے اچ پاکستان دی سکیورٹی دی صورتحال نیشنل ایکشن پلان تے عملدرآمد اتے نیکٹا دی تنظیماں دا جائزہ ڳھدا ڳئیا۔  وفاقی سیکرٹری داخلہ عبداللہ خان سنبل وی ایں موقع تے موجود ہن۔ نگران وزیر داخلہ عزم کیتا جو دہشت گردی اتے انتہا پسندی کیتے پاکستان اچ کوئی گنجائش کائنی۔ اداریاں کوں سارے وسائل ݙتے ویسن۔ قوم آپݨے شہیداں دی قربانیاں دی قدر کریندی اے۔ انہاں آکھیا جو قومی بیانیہ دی کاپیاں تعلیمی اداریاں اچ ݙتی ویسن تانجو طلبہ کوں ایں بارے پتہ لڳے۔ دہشت گرد جماعتاں دے بیانیے کوں رد کیتا ویندے اینکوں ودھݨ توں وی روکیا ویسی۔ میڈیا اچ اینکوں کوئی جاہ کائنا ݙتی ویسی۔ مٹھی بھر دہشت گرد جماعتاں اساݙا عزم کمزور نی کر سڳدی۔ انہاں آکھیا جو دریائے سندھ دے کچے دے علاقیاں اچ ڈاکواں دی پناہ گاہیں دے خاتمے کیتے صوبائی حکومتاں اتے پولیس دی مدد کیتی ویسی۔