کھنݙ، یوریا، زرعی اجناس اتے اشیائے ضروریہ دی سرحد پار سمگلنگ برداشت نئیں، نگراں وزیر داخلہ

اسلام آباد۔31اگست(اے پی پی):نگراں وزیر داخلہ سرفراز احمد بگٹی آکھیے جو کھنݙ، یوریا، زرعی اجناس اتے اشیائے ضروریہ دی سرحد پار سمگلنگ کہیں صورت برداشت نئیں، ایں غیر قانونی کم اچ ملوث عناصر اتے انہاں دے سہولت کاراں دے خلاف سخت کارروائی کیتی ویسی، خیبر پختونخوا اتے بلوچستان حکومتاں سمگلنگ روکݨ کیتے ہفتہ وار رپورٹ وزیراعظم کوں جمع کراون۔ اے ڳالھ نگران وزیر داخلہ سمگلنگ روکݨ بارے اجلاس دی اڳواݨی کریندے آکھی۔ اجلاس اچ سیکرٹری داخلہ عبداللہ خان سنبل ، ڈی جی ایف آئی اے محسن حسن بٹ، فیڈرل بورڈ آف ریونیو، وزارت  تجارت اتے وفاقی و صوبائی اداراں دے نمائندگان شرکت کیتی۔ نگران وزیر داخلہ آکھیا جو کھنݙ، کھاد سودھا اشیائے ضروریہ دی بیرون ملک سمگلنگ ساݙی معیشت تے وݙا ٻھار اتے ضیان اے، ایں سانڳے شئیں دی قلت تھیندی اے اتے مہانڳ ودھدے، کھنݙ، یوریا، زرعی اجناس اتے اشیائے ضروریہ دی سرحد پار سمگلنگ برداشت نئیں کرسڳدے۔ سمگلنگ روکݨ کیتے سرحد تے بارڈر کنٹرول نظام، مشترکہ چوکیاں اتے مشترکہ گشت تے عملدرآمد یقینی ٻݨاوݨا ہوسی جیندے کیتے وفاقی ادارے اتے صوبائی حکومت رل تے کم کرن اتے اشیائے ضروریہ تے ٹریک اینڈ ٹریس سسٹم لایا ونڄے۔